Horticulture Dept. ajanga Kohima nung Hortipreneurs Meet agi

Advisor, Horticulture, Mhathung Yanthan ajanga Hotel Japhü, Kohima nung February 06, 2020 nü mezüngbuba Hortipreneurs Meet nung jembiba noksa nung angur.

Dimapur, Tsüklai/Feb. 06 (TYO): Department of Horticulture ajanga Hotel Japhü, Kohima nung February 06, 2020 nü Marketing of Horticulture Produces atema mezüngbuba Hortipreneurs Meet ayongzüka liasü.
Iba sentong nung Director of Horticulture & Mission Director (MIDH), Dr. R. Elithung Lotha mendenpuba liasü, kong pai ashiba agi, alima nung süngjang-lijang timtiba adokba linüktem ringnung India ya tanabuba jenjang nung lir aser aonsotsü shilem 11 India nung züsenteter. State nung employment aser aluyimba ajungshitsü mechi Nagaland nung aliba aluyimer aser entrepreneurs temi horticulture nung temulung agütsütsü tim, ta ashi.
Department of Horticulture indang Commissioner & Secretary, Y. Kikheto Sema, IAS ajanga okila jembiba mapang, Nagaland nung aluyimer aser entrepreneurs ajungmesotsü mechi aser sentong yangluba nung Nagaland sorkar yaritsü asoshi iba sentong ya ayongzük, ta pai ashi.
Nagaland nung large & medium scale industry tem atema nükla kangabo mali, anungji agro-based industry tem amenoktsü nükla lir, ta pai ash. Aluyimertemi teyari anguba, tzü-mopung den apet aser rongsenketsüng tsütsü tajangzük anguba horticulture crops tem amshitsüla,” ta Kikheto-i ashi.
Paisa ashiba agi, entrepreneur aser aluyimertemi mezüngbuba nung state telungzük nung temulung agüja state nung shishilempaba ketdangsütsü angazüktsüla aser iba sülen tanem tanemi tesem balala nung tenük yoktsüla.
Horticulture ajanga employment adoktsü, anungji district balala nungi entrepreneurs tem lungjemer ajanga ajangzüktsü asoshi inyaktsüla, ta paisa ayongzük. Department ajanga district ajunga nung kechi tsünütsü ajunger, itemji jangjatettsü aser kasa mapang linük tesem balalai tayimtsü aser train ajanga item horticulture produces tem bener aoba nung yariteptsü, ta paisa metetdaktsü.
Kasa sentong nung entrepreneurs temia pei ajangshibatem aser horticulture produces atema market linkages tem lemsatepa jembia liasü.