Horticulture Dept-i Director den tepila sentong agiogo

Dimapur, March 01 (TYO): March 1, 2017 nü Horticulture Department-i sorkar mapa nungi anisüngzüker Director, Pawan Kumar den tepila sentong ka ayongzüka Conference Hall, Directorate of Horticulture, Kohima nung kaogo.
Iba sentong nung tepila o jembidang Pawan Kumar-i pa küm 35 tashi sorkar tenzükba mapa anung alidang Tsüngremi pa taküm anema yutsüba atema tenüngsang agutsü.
Paisa Department nung junior ketdangsertem aser staff temi pa den amalitepa tenzükba atema parnok dang pelaba lemsatep.
Kodang nisungtemi telok ka ama longjemer inyakdir ajak takoktsü lir, ta shia pai ketdangsertem aser staff tem dang Director tasenba dena amalitepa inyaktsü ajungshi. Paisa staff tem dang, nendaka inyaktsü, ochishia inyaktsü aser parnoki mapa ajak meranga inyaktsü ajungshi.
Kasa sentong nung Horticulture Parliamentary Secretary, Kejong Chang, Horticulture Department Secretary, Alan Gonmei (IAS) aser Horticulture Director tasenba, Arun Mech nungeria jembia liasü.
Iba sentong ya Deputy Director Horticulture, N. Amos Ao lenisüba nung agi, Horticulture Deputy Director, Qhutovi Wotsa-i tesentepertem pelaa agizük aser District Horticulture Officer, Dimapur, Jerry Patton-i tepela anküp o jembia liasü.