Houthi teloki Yemen nung mitkar züngsem 15 tashi tepset: UAE

Aden, October 06 (Agencies): Yemen sorkar anemer telok, Houthi züngsemtemi tongpang nung amshitsü rocket kalokja Yemen anülulentip tsütsü Aden yimti nung mitkar züngsem 15 tashi tanü Mongolbar nü tepsetba osang ka United Arab Emirates (UAE) sorkar ketdangsertemi metetdaktsüogo.

Tan amakba lendong nung Yemen mitkar aser Saudi Arabia-i aniba teloktep Arab mitkar züngsemtem densema ajak agi nisung 15 tashi tepsetba osang tang tashi nung jangjaogo ta parnoki ashi.

“Tanü lendongji küm 1 tejaklen nungi tenzüka Yemen sorkar anema nokdakba Houthi züngsemtemi inyakba osang jangjaogo,” ta UAE sorkari ketdang asüba WAM osangi metetdaktsü.

Houthi züngsemtemi Saudi nung jenoka lir külen taküm July ita Aden-i tanaben shilangba Yemen lenirtem anenzükba hotel ka aser teloktep Arab mitkar tesep ka tanü rocket aika kalokja amakba osang jangjaogo ta Yemen mitkar lenirtemia metetdaktsü.

Ajisüaka, tan lendong nung Yemen Ato Kilonser, Khaled Bahah aser par tongti yimsüsürtembo meyirui taküm kümzükba osang jangjaogo.

Houthi teloki küm ka tejaklen nungi tenzüka Yemen yimtiba, Sanaa tashiyim agi agiba sülen Yemen Tir, Abdu Rabu Mansour Hadi-i kidangsüa, Saudi linük nung jenoka lir külen tawa Aden yimtii tanaben shilanga aoba osang bushiteta lir.

Hadi nem Yemen yimsütsütsü tashi tanaben agütsütsü nükjidong nung teloktep Arab mitkartemi par tayimtsü amshia taküm March ita nungi tenzüka Yemen nung tesep tentetba Houthi telok anema raraba osanga bushiteta lir.