Howoto Hollo asüba atema Akato Chophi-i mangyim osang lemsatep

Dimapur, Dec. 11 (TYO): NSCN (R) Vice-President, Inno Akato Chophi-i NSCN/GPRN (Reformation) MIP sangdong ka ajanga Hovishe Village nungi Tolhopu Hollo’er jabaso tambusang, Howoto Hollo, Akukau (GB) asüba atema mangyimba osang lemsatep.
Asür Howoto-i yimtenren, loktiliba aser Arogo tsütsü menden aser sabang balala nung tenzüka aruogo aser pa sasep nung lokti nung temelenshi bener arutsür ka liasü, ta MIP sangdong nung shia lir.
“1960’s mapang nung pai linük tenzükba wadang nung aden aser pai Naga Army nung menden balala nung tenzüka aru; pa dak sempet aliba ajanga pa ADM (Additional District Magistrate) jenjang tashi nung shim. Pai sorkar mapa nung join asü aser pa Head GB nungi anisüngzükba mapang tashi Niuland’s ADC Office nung inyak,” ta sangdong nung shia lir.
Pa anisüngzükba sülen WSH (Western Sumi Hoho) nung Advisor aser WSBAK (Western Sumi Baptist Akukuhou Kuqhakulu) Executive Council nung Chairman inyak.
Chophi-i ashiba agi, asür Howoto ya kanga tenendak aser pei asoshi mebilemi inyakba lenir ka liasü, aser pa asüba ajanga tapok tulu paaogo, aser ibaji Naga nunger, talisa Sumi nunger atema takoksa tulu asütsü, ajisüaka pai tsüngnep tajung yutsüba nungji lanurtemi anidaktsü.
“Mapang talangka lenir den külemi inyaksemba atema ni pelar,” ta pai ashi.
Vice-President-isa tajung Tsüngremi asür tanela tesünep nungi anisüngzükdakjang aser mangyim mapang nung par kibong züngsem aser medemertem nem tesünep agüjang ta sarasademtsür, ta kasa sangdong ajanga metetdaktsü.