HP CM-i Virbhadra Singh-i pa menden toktsütsüla: BJP

New Delhi, September 27 (Agencies): Central Bureau of Investigation (CBI)-i Himachal Pradesh chief minister Virbhadra Singh anema ken o ka benoka pei dak mapet ali rongsen aser kiojen aliba ken o nung par rongsen bushisüngdangba ken o dak sentakba nung BJP-i pai Chief minister menden toktsütsüla, ta shiogo.
Iba ken o nungsa BJP-i Congress Tir Sonia Gandhi aser tatong Tir Rahul Gandhi nati Singh CM menden nungi aludaktsütsüla, ta takhangba agütsüogo.
Singh CM menden nung maneni amentsü temeten mali, ta BJP lenirtemi ashi.
“Ochimashi ajunga indang tetsüji Congress lir,” ta parnokisa ashi.
“Iba ken o ya ochimashiba ken o lir ta jangjaogo. UPA yimsüsüba mapang Union steel minister ka ama pai (Singh) ochimashi mapa inyakbaji tan ken o ajanga kuli tejangja sayuogo. Pai maneni iba menden abentsü temeten mali,” ta Union health minister J P Nadda-i ashi.
“Himachal nung Congress sorkar ya ochimashi tesep ka kümogo aser nüburtem timtemteper. Ochimashi nung tarak aketba chief minister ka dang nungi nai kechi tajung imlatsü,” ta Union minister-isa ashi.
CBI-i Singh aser pa kinüngtsü Pratibha Singh, par jabaso Vikramaditya Singh, par jala Aparajita Singh aser pa atema inyaktsür LIC agent Anand Chauhan nunger parnok dak mapet rongsen aliba ken o bushisüngdangtsü atema enquiry agia liasü, aser yashi pa anema ken o benokogo.