HP, Gujarat elections exit polls Dec 14 nung ang agutsütsü akok: EC

New Delhi, October 26 (Agencies): Himachal Pradesh aser Gujarat assembly elections indang exit polls osang December 14 nikongdang ang agutsütsü akok, ta Brihostibarnü Election Commission nung tongti ketdangser kati metetdaktsü.
Tawa Election Commission-i tetuyuba agutsüba nung ajemdaker ketdangser-i, state tem nung election telemsa ajak tembangba sülen ghonda tesadang ka lir ang exit polls telecast asütsü akok, ta metetdaktsü.
Himachal Pradesh nung assembly election kenüyongi (November 9) dang agitsü, ajisüaka Gujarat nungbo anogo ana telemsa nung- December 9 aser December 14 nü agitsü.
Ajisüaka Gujarat nung election anaprong metembang tashi Himachal Pradesh election exit polls osang sangongtsü makok.
Tang aliba ozüngtem ajangasa voting metenzükdang ghonda 48 lia opinion polls nokdangtsü atema Election Commission nem temelaba agüja lir.
Gujarat elections mezüngbuba shilem atema tenüng agütsütsü tatembangbuba anogoji November 21 aser tenüng agientsü tatembangbuba anogoji November 24 lir, iba sülen December 9 nü election agitsü.
Iba denji kasa tanabuba shilem nung tenüng agütsütsü atema tatembangbuba anogoji November 27, tenüng agientsü anogoji November 30 aser December 14 nü election agitsü.