HP India-i osettem nung jenjang ajungket

January 21, 2017 (Agencies): Alima ajunga nung sen jenjang melenshiba, aser osettem nung jenjang melenshiba den jangyu medema aotsü atema printing aser personal computer yangluba company HP-i Hokolbarnü India nung osettem jenjang shilem asem nungi pungo tashi ajungket. Oset shia sen jenjang balala ajungket.
Tang yokya aliba osettem yokmaba sülen oset tasen aruba tem nung jenjang ajungketer ayoktsü, ta Company ketdangser kati Noida nung osangbener dang ashi.
“Shishilembaba nung yimya ka ama company-i mapang shia tensa apir osettem nung jenjang yanglushir. India nung HP osettem nung jenjang ajungketer. Oset ajak nung jenjang balala ajungkettsü,”ta Rajiv Srivastava, Managing Director, HP Inc. India-i osangbener dang ashi.
India nung PC yanglurtem rongnung HP company temaba jenjang nung lir. Noklang nung shilem 28.8 parnok meyong lir.
“Iba Digital putu nung talirtem aser shishilembartem nem parnok mapa nung takok angutsü asoshi onoki oset tajungtiba agütsütsü asoshi meranger, iba ajanga onok temaba jenjang nung lir,” ta Ketan Patel, Senior Director, Personal Systems, HP India-i osangbebertem dang ashi.
HP-i iba hopta alima nung mezüngbuba workstation, koba dang Z2 Mini ta ajar iba ya India nung alitsü asoshi angutsü ta metetdaktsü.
Iba oset ya Computer Aided Design (CAD) aser tanga computer amshiba industry tem nung amshitsü asoshi yangluba oset ka lir.
HP Z2 Mini workstation sen merjang 72,000 tong January 25 nungi India nung alitsü asoshi angutsü.