HP nung School bus ka tsükokba nung kaketshir 27 asü

Shimla, Rongchii 9 (Agencies): Kanga tang taoksatsü lendong ka nung Tentonü Himachal Pradesh kübok Nurpur constituency, Malkwal tesem anasa Wazir Ram Singh Pathania meyong private school bus ka longreni lua tsükokba nung kaketshir 27 dena nisung 30 tashi süogo. Kaketshirtem ya class 1 nungi V tsüngda azüngertem lir.
Himachal Pradesh transport minister Govind Singh Thakur-i iba osang jangjashija osangbenertem dang ashiba agi, iba lendong nung kaketshir 27 süogo. Arishi küm 67 tain bus driver Madan Lal den tetsür tesayur ana dena iba lendong nung süogo, ta Kangra SP Santosh Patial-i ashi.
Iba dak sendakba nung Chief Minister Jairam Thakur-i asür kibong shia nem teyari sen lakh pongungu agütsütsü asoshi nangzükogo.
Tenük kuli agütsürtemi ashiba agi, gari anisang yagi gari mazüokteti aküm, koba longreni ajuzüka alu.
SDM Nurpur, Abid Hussain-i ashiba agi, tasümangtem ya police aser idakji aliba nüburtem teyaritep nung agitetogo aser yirur alirtem mozüki balalai bener ogo.