HPBWC ajanga Hazi Park nung mürekmeju

Dimapur, Aami/June 16 (TYO): Hazi Park (Hongkong Market) ya ita ana dak tema shibanga lir, saka totuyuba kar dener iba tesem ya kobi melie lapoktsü ama District Administration ajanga sayur, ta Hazi Park Business Welfare Committee tir Hukato V Achumi-i sangdong ka nung ashi.
Iba mechi Hazi Park Business Welfare Committee ajanga June 16, 2020 nü shishilempaba tesem ajunga nung mürekmeju mapa inyak, dokan kiburtemi pei dokan tem mürek aser iba tesem lapoktsü totuyuba agütsüba mapang lapoktsü asoshi renemshia ayu, ta sangdong ajanga ashi.
HPBWC puri Sodium Hypochlorite solutions, spraying machine anepalua nisung ana PPE kits agir Mongulbarnü market area nung mesen tepsetba mozü akha. Sodium Hypochlorite solution amshia parnoki Hazi Park/Hongkong Market ajunga nung mozü akha.
Shishilempaba tesemtem nung mozü akhaba mapang HPBWC züngsemtema liasü aser yakta Hongkong Market nung customer tem anioktsü teimla aliba lemsatep.