HPC(D) aser sorkar tsüngda tetsükdaktsü adok

Aizwal, September 4 (Agencies): Mizoram sorkar aser Hmar People’s Convention (Democratic) na tsüngda yimjung ken o jembitsü aliba nung tetsükdaktsü adokogo, kechiyong HPC(D) puri takhangbatem agütsütsü state sorkari memolunger, ta sorkar ketdangser kati ashi.
“Lalhmingthanga Senate-i aniba HPC(D) telokpuri Constitution sixth schedule kübok Hmar nunger bulua aliba tesem atema autonomous district council ka kümtettsüba aser lokti asem tsüngda yimjung ken o jembiba nung Centre nungi ketdangser tejen ka tendaktsütsüba amala takhangbatem senden mamen tsüngda akhanger,” ta pai ashi.
State sorkari iba amala takhangbatem agütsütsü asoshi memolunger kechiyong yimjung ken o jembitsü asoshi jelia takhangba kecha malitsüla, ta sorkari nokdaker, ta paisa ashi.
Iba senden ya August ita tatemlen akatsüba liasü.
H Zosangbera-i aniba telok den yimjung ken o jembishinü yakta tenzüktsü aser taruba senden ya official level nungbo tatembangbuba asütsü südi, iba sülenbo iba jembishinü ya yimden yimsüsüba jenjang nung dang jembishinütsü, ta pai ashi.
Mizoram sorkar aser HSP pur na tsüngda 1994 küm July ita tezüngzüktepba ka yanglu parnok bendanga agütsüba sülen HPC (D) telungpur kümtet aser iba nung Senate ya tir liasü.
Iba sülen pai par telok nungi “Army Chief” Lalropuia Famhoite dena tanga lenirtem den mashishitepi Kuki nunger telungpur telok den külemi Suspension of Operation (SoO) Manipur sorkar den tezüngzüktepba yangluba ajanga, Zosangbera-i aniba teloki pa mapa nungi anentsü.