HPMBWC & MCD-i Peace Award 2016 angur nem tenüngsang agütsür

Dimapur, February 2 (TYO) : Muslim Council Dimapur nung Working President aser Hazi Park Market Businessmen Welfare Committee nung Advisor, Ahidur Rehman nem Peace Channel-i Peace Award 2016 agütsüba atema pa nem tenüngsang agütsür ta HPMBWC-i sangdong ka nung metetdaktsü.

HPMBWC-isa taoba Pro-Vice Chancellor, Nagaland University Prof Lanunungsang-i Peace Award anguba atema tenüngsang agütsür, ta HPMBWC tir, Hukato V Achumi-i sangdong nung shia lir.

Muslim Council Dimapur nung working president ka ama Rehman-i nübo agi tangar memenepertem asoshi meranga inyaka arur. Pai district administration aser lokti tsüngda apu alar ka ama mapa inyaker. March 5, 2015 nü Dimapur lendong nung pai tensa meraksadaktsütsü atema mapa tajung inyakba ajiteta pa nem iba sempet agütsüba atema kanga pelar, ta HPMBWC sangdong nungsa shia lir.

Ano külen, Prof Lanunungsang-i küm aika Naga loktiliba atema mapa tajung inyaka arur aser pa nem Peace Award agütsüba atema Peace Channel nem tenüngsang agütsür. Iba sempet angur nisung anaprongi lokti asoshi mapa inyaka aodang maneni takok ngudakjang ta HPMBWC-isa moatsür, ta tirisa metetdaktsü.

Muslim Council Dimapur-ia sangdong ka nung Prof Lanunungsang Ao aser Ahidur Rahman Choudhury na nem tenüngsang agütsüba metetdaktsü.

Director Fr Dr. C.P. Anto-i anir Peace Channel Nagaland-i nung Prof Lanunungsang Ao aser Ahidur Rahman Choudhury na nem Annual Award agütsüba atema kanga pelar, ta A. Hannan Tapadar, president, MCD-i sangdong nung shia lir.