HRD Minister Irani gari lendong nung yiru

Mathura, March 06 (Agencies): Honibar aonung tesü Yamuna Expressway nung Union Human Resource Development Minister, Smriti Irani amenba garii tejaklen aliba gari ka dak tsükoktsüba lendong nung la tera yiruogo.
Irani amenba gari jagi tejaklen aliba gari dak tsükoktsüba sülen lai meina senzüba gari aika tsüktepa oa motorcycle anir ka tsükset.
Yasüng la Vrindavan nung Bharatiya Janata Yuva Morcha-i ayongzükba sentong ka nung adenba sülen miyipa arudang iba lenmdong atalok.
Osang ajanga ashiba agi, Irani meinba gari rongnung pilot gari jagi tanga gari ka dak tsükoktsü, iba sülen la mena aliba gari jagi pilot gari dakji tsükoktsü.
Iba lendong nung la teka tabelen aser tetsüng tera yiru, ajisüaka mozü kidangibo anir mao, ta kasa osang ajanga ashi.
SSP, Rakesh Singh-i, iba lendong nung motorcycle anir ka tsükset, aser pa asüba kuliji bushisüngdangba sülen ang jangjatsü, ta ashi.
“Nisungbaji Agra nungi doctor ka tenüng agi Ramesh lir, aser pa yangjisa atanga asü, ano külen pa den bike tesülen amener tebu aser aianu nata yiru,” ta police ketdangser Singh-isa ashi.
Iba dak sentakba nung Irani-i, “Ni lendong atalokba osang metetner ajak dang ya metetdaktsür- ni junga lir. Nenoki bilemtsüba aser sarasademtsüba atema pelar,” ta ashi.

You must be logged in to post a comment Login