Hrithik aser Deepika na film ka nung külemi shilem agitsü

Chiteni/July 10, 2019 (Agencies): Osangtem shidak süra Hrithik Roshan aser Deepika Padukone nati Farah Khan indang taruba film nung shilem agitsü, koba tena külemi shilem agiba film mezüngbuba asütsü. Iba film ya Hema Malini aser Amitabh Bachchan nati tongti shilem agiba Satte Pe Satta film tanaben yanglushiba ka asütsü. Film nung Hrithik-i Big B shilem agitsü aser kasa mapang nung Deepika 1982 cult classic nung Hema Malini indang shilem agitsü mulunga agizükogo.
Taküm küm tetenzüklen Rohit Shetty aser Farah Khan na film ka asoshi longjemtsü ta osang adoka liasü. Iba film ya Sooryavanshi director-i produce asütsü aser Farah-i direct asütsü, koba 2014 küm Happy New Year film sayaba sülen Farah asoshi mezüngbuba director ama shilem agiba film asütsü.
Osang ajanga ashiba agi, Farah-i Satte Pe Satta film yanglushiba direct asütsü koba Raj N Sippy-i mezüng direct süa liasü. Pinkvilla sangdong ka ajanga ashiba agi, film nung tongti shilem agitsüpurtem shimadokogo. “Farah aser Rohit napronglai Deepika Padukone nem film nung shilem agidaktsünüa liasü kechiyong tenati la saklokba dang masü saka iba shilem asoshi la kanga tapet asütsü. DP mezüng film nung shilem agiba mapang nisung ajaki la Hema den kanga mesükteper ta shia liasü. Farah-i DP dang otsü ashiba mapang lai otsü kanga saklokadok aser idangjisa film nung shilem agitsü mulunga aküm,” ta source ka ajanga metetdaktsü.
Deepika tang agi Farah den tasembenbuba aser Rohit den tanabenbuba shilem agitsü saka Hrithik denbo tang mezüngbuba shilem agitsü. ’83 film nung kinungbo Ranveer Singh den külemi shilem agiba sülen iba ya la asoshi mezüngbuba project asütsü.
Deepika, shiba 2018 küm Padmaavat film nung shilem agiba sülen tang tashi nung film ka danga sayaa mali, la Meghna Gulzar indang Chhapaak film nung shilem agiba angutsü. Kasa mapang nung Hrithik tang Super 30 film kanga mazüngi ajungketba mapang ka lir koba July 12 nü sayatsü.