Hrithik-i Kangana tena ken o nung tang ang ola adoker

Mumbai, March 17: Actor Hrithik Roshan-i actress aser model Kangana Ranaut tena mangatettep ken o nung ola madoki liasü saka Brihostibarnü pai, email address ka kü indang ta ashibaji tiyazü, ta ola adokogo.

“Kija dak atalokba kar kodang ayimsünga meteta kümdir iba jagi menüngdakba olulu ang akümer kechiba süra tangari kechi shitakba atalok ibaji memetet,” ta Hrithik-i official sangdong ka ajanga metetdaktsü.

“Nisung ajak akümtsübua ni iba ken o tim tsütsülen nungi tajungtiba nung tembangtsü merangdang. Iba ken o temai adoka jembitsüji kangabo menüngdak. Ajem ajema ola matoki liaka pei aser kibong tenüng memenükdaktsütsü mechi khen mesüra khenbosa ola adoktsüsa akümer,” ta pai shisem.

Hrithik-isa, email id — hroshan@email.com ji pa indang email address masü aser iba mail ID ajanga la den tongtepratep asür ta angashia, iba dak sentakba nung December 12, 2014 nü Mumbai Cyber Crime cell nung taitsüba shidi ka agütsüogo. Ni iba ID den tesentaktep khenyongi mali, ta metetdaktsü.

 “Iba tatalokba ya ‘identity theft’ indang ken o ka kü dak ponglokba ajanga adokba lir. Ni agütsüba taitsüba shidiji March 5, 2016 nü mapa aküm aser crime unit-i email ID amshisangji putettsü ana nung lir. Khen ibaji putetra iba ken o aremtsü. Shisatsü anisüngzüka ayutsüji kanga dang nüngdak ta nibo bilemer. Ni tangar metsüdaktsüsa mesüra shisatsü nung yirutsüsa kodanga meinyaktsü aser mejembitsü. Iba tatalokba ya osang tejangja mongutetba ajanga tuluba aküm. Kü dang ola matoki liang ta ashiba ajanga ni küm ana ola matoki liogo,” ta pai ashi.

Interview ka nung Kangana-i, “Kechiba tesüiba mapang medemer teburtemi ano maneni tesentaktep ayutsü meranger-ar na ? Ni ibaji mangateter,” ta ashiba ajanga iba ken o poktet.

Iba ken o nung Hrithik-i “Aashiqui 3” nung Kangana melena Sonam Kapoor melenoktsü ta jembiba otsü dena densema lir.