HRLN Nagaland-i H&FW department anema PIL 20 benok

Kohima, November 29 (TYO): State Health & Family Welfare (HFW) Department-i Indian Public Health Standards Guidelines 2012 nung aliba ama meinyakba aser state nüburtem nem health service agütsütsü sentokba atema parnok anema Human Rights Law Network (HRLN) Nagaland-i Public Interest Litigation (PIL) 20 benokogo.
Tanü Deobar nü Kohima nung osangbenertem senden ka nung HRLN Nagaland Coordinator, Rosemary Dzüvichü-i, PIL ji tan ita tsüngda benokogo, ta metetdaktsü.
PIL tem aser SLP temji Principal Bench of Gauhati High Court (GHC), Guwahati aser GHC Kohima Bench nung benok, ta laisa ashi.
Rosemary-i ashiba agi, PIL temji tongtibangsa tezülen aliba district hospital tem, Primary Health Centre tem (PHCs), aser yimtsüngtem nung aliba Community Health Centre tem (CHCs) aser Sub-Health Centres (SHC) nung department-i service junga magütsüba atema lir.
Laisa, state nung aliba yimtsüngtem nung doctor tem maliba, mozü junga manguba aser infrastructure junga maliba ama health service junga magütsüba ajanga kinü tetsütem aser kinü tanurtem aika asür, ajisüaka item osangji magütsür, ta metetdaktsü.
State nung 2012-14 küm tanur 164 süogo aser 2012 nungi 2015 May ita tashi nung tanur tetsü 46 süogo, ta laisa ashi.
HRLN Nagaland-isa NRHM nung nüburtem indang sen crore 62 tim mesüi amshiba dak sentakba nung Special Leave Petition ka benokogo, ta Rosemary-isa metetdaktsü.
“State nung health service agütsüba maparen junga aotsü atema onoki PILs aser SLPs benokogo,” ta lai ashi. HRLN Nagaland-i sensakertem yaria arur, ajisüaka PIL benokba nungji yimtenren tsütsü kecha mali, ta Rosemary-isa shisem.
Tanü osangbenertem senden nung loktiliba temelenshi atema inyaker, Joe Dzüvichü densema HRLN Nagaland nungi züngsem asem densema liasü.