HSLC 2020 nung tematiba 50 nem CMMSF agütsü

Chief Minister’s Meritorious Students’ Fellowship (CMMSF) sentong online ajanga agiba noksa nung angur.

Dimapur, July 19, 2021 (TYO): High School Leaving Certificate 2020 nung tematiba jenjang nung takok angur nem Chief Minister’s Meritorious Students’ Fellowship (CMMSF) agütsüogo.

July 19, 2021 nü online ajanga agiba sentong nung sempettem agütsü.

“Nenoki takok tajung angubaji meranga inyakba aser alizüng ayuba ajanga lir. Maneni tarutsü anogotem nunga nenoki state nem konang-nüngsang bentsür arutsü imlar” ta Chief Minister, Neiphiu Rio-i ashi.

“COVID-19 wara ajanga tetsükdaktsütem ajuruaka, yaküm NBSE tatidang indang result nung pass percentage tajungba akümba nguogo. Kaketshirtemi maneni bendanga agütsüsüla, alizüng ayutsüla aser wara ajanga tayongzükba ajurubatem ajak kokteta azüngtsü ayongzüker” ta Rio-i metetdaktsü.

“Kaketshirtemi state sorkar mapa inyaktsü atema dang mebilemtsüla. Naga lanur kari dang IAS aser Central Services mapatem angur anungji tekolok techiratemibo Union Public Service Commission kübok tatidang balala agütsütsü asoshi renemtsüla” ta paisa ayongzük.

“Alima kanga ainer aser talisa science & technology nung kanga renloka aoer. Anungji Education department-ia education system tajungba kümdakja kaketshirtem anitettsüla. Nagaland sorkari sorkar school 35 aser nija school 3 nung secondary & higher secondary levels nung skill/ vocational subjects sayaogo” ta Rio-isa ashi.

Sentong nung School Education Advisor, K. T. Sukhalu-ia takok angur nem tenüngsang agütsü aser kaketshir ajak atema milen amertem asütsü ayongzük.

Sentong nungsa NBSE Chairman, Asano Sekhose-i CMMSF aser iba sempet atema eligibility criteria indang osang metetdaktsü.

HSLC examination nung tematiba kaketshir 50 nem NBSE-i fellowship agütsür. Iba fellowship ya Nagaland nung Indigenous Scheduled Tribes nungi kaketshirtem asoshi lir aser küm 5 atema agütsür.

Tanü agiba sentong nung sempet angurtem- Model Higher Secondary School nungi Azizi Phesao aser St. John Higher Secondary Residential School, Dimapur nungi Ngamjong Jn Yanlem natia o jembi.