HSSLC tatidang tenzükogo; Tanü nungi HSLC tatidang tenzüker

February 14, 2017 nü (Abelen) Christian Higher Secondary School, Dimapur nung Class 11 aser 12 kaketshirtem tatidang agütsüba aser (Achiji) Kohima nunga HSSLC examination centre ka nung kaketshirtem tatidang agütsüba noksa nung angur. 

Kohima, February 14 (TYO) : Tanü nungi Nagaland nung tatidang agütsürtem mokdang kübok maitdaktsüba agi Higher Secondary aser class XI promotion tatidang agitsü tenzükogo aser tanü Nagaland kübok tesem balala nung kaketshir 30,000 den tema tatidang agütsüogo.
Tatidang anaprong ya Nagaland Board of School Education (NBSE) ajanga ketdangsüa agir.
HSSLC tatidang agütsütsü atema kaketshirtem examination halls-i aotsü atema mokdang ayongertemi tatidang mapang public transport, private vehicles aser taxi tem senzütsü temelaba agütsü.
Asüng nungi High School Leaving Certificate Exams tenzüktsü aser iba tatidang yaa NBSE-isa ketdangsüa agir. Class X tatidangji centre 76 nung agitsü aser kaketshir ajak agi parnok 22446 lir.
Tanü Western Angami Youth Organisation vice president, Asa Seyie-i ashiba agi, kaketshirtem aser examination duty lemzükba tesayurtem timtem magütsütsü atema tetuyubatem agütsüogo.
Kohima nung K. Kelio ta ser Class XII tatidang agütsür kaketshir ka den iba osangbeneri jembidang, parnok mokdang kübok maitdakjaka, tensa ajanga parnoki tatidang agütsüdang tetsübu agi temulung sadoka mezülutet, ta ashi.
“Tanü onok atema tatidang mezüng anogo liasü, saka onok temulung mesüngjemteti tatidang agütsüogo. Ajisüaka, tesem balala nung mapa lemzüka aliba mokdang ayongertemi onok nem timtem kecha magütsü” ta paisa ashi.
Ano Khriezovonuo ta ser kaketshir katia ashiba agi, NTAC Kohima aser JCC nati kaketshirtem tatidang agütsütsü atema melaba atema kanga pelar.
“Onoki tatidang agütsütsü atema kanga meranga bushiyonga aru aser tatidang agitettsüsa timtem magütsüba atema onok pelar” ta laisa shisem.
Tanü examination centres nung tatidang tiptema agitsü atema district administration-i Dobashi tem aser police mapa lemzükja liasü.