HTE Minister-i Fazl Ali College semdang

Dimapur, Aami (June) 2 (TYO): Aami (June) 1, 2018 nü Higher and Technical Education Minister, Temjen Imna Along-i Fazl Ali College semdang.
Minister Imna Along-i tang mezüng atema FAC semdangdang tesayurtem aser kaketshirtem den ajurutepa sensaksem aser paisa College infrastructure reprangdangba den College nung laboratory tem aser kaketnang semdanga liasü.
FAC nungi 2018 batch ajanga Math Honours aser Geography Hons nung toppers liasü ta osang angazükba sülen Imna Along-i topper angur ana- Sentirenla, Maths Hons aser Sakurepla, Geography Hons na nem sen meyirjang pungugu senpet agütsütsü ta nangzük.
Fazl Ali College nung tetsürtem atema state-of-the-art washroom ka yanglutsü ta Minister-i osang metetdaktsü aser paisa Swachh Bharat Abhiyan dak sendakbamapa inyaktsü atema College ayongzük.
Minister Imna Along-i sensaksemba mapang AKM Tir Imkongwati aser Directorate of Higher Education, Kohima nungi ketdangsertem liasü.