H&TE Minister-i Goodwill Boys’ Hostel lapoktsü

Dimapur, Luchii (December) 11 (TYO): December 11, 2018 nü Higher & Technical Education Minister, Temjen Imna Along-i Kohima College nung Goodwill Boys’ Hostel lapoktsü.
Hostel Campus, Kohima College nung Higher Education Director, Anungla Aier aser Kohima College nungi tesayurtem lia Minister-i yipten 100 aliba tebur hostel lapokja liasü.
Nagaland nung sorkar college tulutem rongnung Kohima College ya ka lir asr iba college nung kaketshir 1600 shi aser tesayur 60 lir.
Iba sentong nung adenba atema kanga pelar. Higher & Technical Education, Nagaland lenitsü mapa benzükba sülen nungi department nung mapa tajung aika inyaker aser iba temoatsü atema Tsüngrem nem tenüngsang agütsür, ta Minister, Temjen Imna Along-i ashi.
Naga nungertemi longjemer mapa inyaktsü mapang tongja tongogo. Naga nunger ya tasü tait aser temulung tulu lir aser bendanga agüja inyakba nisungtem ta züngshir, saka asangsang nungbo asenoki iba amaji malir, ta paisa ashi.
Sentong nung tesenteper ajak den Minister Imna-i Khristmas salem metetdaktsü aser temoatsü aketba Khristmas ka amungtsü atema nüngdakbapur yaritsü ayongzük.
“Khristan ta asübaji masü saka asen taküm nung Khrista alibaji dang chichiba Khristan taküm lir. Iba Khristmas nung asenoi taginübatem agiendi aser tangar atema dang bilemtsüdi. Asenok dak temeim melira, temoatsü Khristmas memungtettsü” ta paisa ayongzük.
Asenoki nüngdaktem toktsür taginübatem ang teimba kümdaktsür. Iba benjung mapang asenoki tangar nüngdaktem asoshi bilemtsüdi, ta Imna Along-isa shisem.
Tanü lapokba Goodwill Boys’ Hostel ya Kohima College mesüra Higher education department mesüra Nagaland sorkar indang dang masü saka asen tarutsü tia meyong lir. Anungji, kaketshirtem aser ketdangsertemi merükmejua iba centre anepalutsüla, ta paisa ayongzük.
Sentong nung Executive Engineer, School Education, Kelechütuo Pienyü-i technical report metetdaktsüdang, Kohima College nung yipten 100 aliba Hostel ya 2013 küm M/s Eastern Associates-i yanglutsü tenzük.
Iba hostel ya sen lakh 480 estimated budget nung tenzük aser ground floor, 1st floor & 2nd floor lir. University Grants Commission aser HUDCO ajanga senotsü teyari agütsü, ta Kelechütuo-isa ashi.
Kohima College Principal, Dr. Watijungshi-i tesentepertem pela agizükdang College nung yipten 50 aliba tetsür hostel ka lir aser tarutsü anogotem iba nung ano yipten 50 bendenloktsü.
January 2019 nungi Goodwill Boys hostel nung kaketshir 50 anioktsü, ta Dr. Watijungshi-isa shisem.
Tanü agiba sentong nung mendenji Assistant Professor, Theyiesinuo Keditsu liasü aser Warden Boys Hostel, Evothungi anküp tepela o jembi.