Htin Kyaw-i Myanmar Tir inyaktsü tenanzükba agiogo

Naypyitaw kübok parliament ki kilung nung Myanmar Tir tasenba, Htin Kyaw (Tiyongtsü); 1 buba Tatong Tir, Myint Swe (Abelen) aser 2 buba Tatong Tir, Henry Van Thio nungeri yimsütsü menden abentsü tenangzükba agidang agiba noksa ka yangi angur. (Naypyitaw, March 30)

Naypyitaw, March 30 (Agencies): Myanmar Tir tasenba, Htin Kyaw-i Myanmar Tir inyaktsü tenangzükba Naypyitaw yimti kübok parliament kidang tanü, Bodbar nü agiogo.
Myint Swe aser Henry Van Tio natia Myanmar Tatong Tir inyaktsü asoshi tenangzükba agi aser iba sentong nung parliament house anaprong nungi yimsüsürtemi shilem agia liasü.
Arishi küm 70 tain Kyaw-i tanü Tir inyaktsü tenangzükba agiba ya Myanmar mitkartemi 1962 küm nungi tenzüka Myanmar linük indang yimsüsütsü tashi benokba sülen tan mezüngsüa nüburtemi shimba Tir kati par Myanmar madak yimsü asütsü tenangzükba agir lir.
2011 nungi tenzüka, Myanmar Tir menden abensang, taoba mitkar general, Thein Sein melenzüka, Kyaw-i tanü Tir tashi agizüker lir.
Mitkartemi nungitsang, Tir Sein-i yimsüsütsü tashi benokba sülen par Myanmar nung yimtenren aser rongsenren temelenshi aika bener arutsüogo.
“Myanmar linük nung democracy yimsüsütsü yimya asangsang nung benshitsüsa tang lateta aliba linük temzüng tajungba küma melenshitsü nangzüker,” ta Kyaw-i Tir inyaktsü tenangzükba agiba sülen metetdaktsü.
“Myanmar ajunga sentaktepshidaktsütsü, linük ajunga nung yimji yimjung lidaktsütsü aser nübur taküm jenjang temaba jenjang nung ajungkettsütsü alizüng sorkar tasenbai yua lir,” ta pai shisem.
Mitkartemi taoba mapang latetba linük temzüng nung home affairs aser defense ministry na densema, parliament menden noklang nung shilem 25 mitkar lenirtem nem agütsütsü aser bendanger den kibong akümer mesüra pei chirnuri bendang senso agia alirtem nem Tir menden mebendaktsütsü ozüng lateta lir.
Aji oda, linük temzüngi memelaba yong National League for Democracy (NLD) yimtenren telok lenila, Aung San Suu Kyi-i election nung takok ngua aka, lai linük Tir menden abentsü temeten mongutetsüsa jenjang tamajung ajuruogo.
Nobel Peace sempet agizükla, Suu Kyi-i Tir menden abentsü temeten mongu aka, lai Kyaw ajanga Myanmar madak yimsü asütsü nangzüka lir.
Ano, tanü Cabinet minister inyaktsü asoshi tenangzükba agir yimsüsür 18 rong nung Suu Kyi-ia densema liasü.