Huawei Online Smartphone jenjang ajungkettsü

July 8, 2017 (Agencies): Sorkari smartphone yanglurtem dang nung Goods and Services Tax (GST) ama basic customs duty (BCD) shilem 10 ajungkettsüba sangdongba sülen, China nunger smartphone yangluba company Huawei ajanga online nung parnok indang phone tem jenjang tera ajungkettsüba sangdonga liasü.
Brehostibarnü Delhi nung 6GB ‘Honor 8 Pro’ flagship smartphone sayaba mapang Director, Product Center, Huawei India Consumer Business Group Allen Wang-i osangbenertem dang ashiba agi: “India nung onok indang offline aser online business lir. Online nung jenjang tera ajungkettsü, saka offline nungbo mekongshitsü.” Sen jenjang kodang nungi ajungketsü ibajibo pai mashi saka linük nung consumer temnem saru talila agütsütsüba khuret magütsütsü asoshi jenjangtem asadangtsüba pai shisem. “Tang tashi nung onok osettem kecha nunga jenjang ajungketa mali. Jenjangji factor ka dak dang medaloker mali. Shishilembaba tajungba akümba ama volume-a tuluba akümer,” ta Wang-i osang benertem dang ashi.
GST ya tasa kanga tajung ta shia iba ajanga India economy nung temelenshi bener arutsü imlaba pai lemsatep. “GST ya linük atema tajung asütsü ta bilemer, aser economy tajungba kümra onok shishilembaba tajungba akümtsü,” ta paisa ashi.
Huawei India nung taküm küm tatemi product tasen bener arutsü asoshi renema lir. “Onoki taküm Honor 6X aser Honor 8 Lite amala sayaogo aser taküm küm tatemi devices aser model tasen bener arutsü asoshi renema lir,” ta Wang-i metetdaktsü.
Huawei-i tawa linük nung exclusive service centre tasen 17 amenokogo. “After service ya consumer tem atema kanga tongtibang lir. Aji asünung onoki yimti tongtibangtem nung service centre 17 amenokogo. Linük nung ajak senteper onok indang multi-brand service centre 200 dak tema lir. Onok atema India nung shishilembadak ya kanga tongtibang lir, aser brand kechaia iba ya sendoktsü makok. India ya alima ajunga nung smarthphone shishilembadak temaba akümtsü akok,” ta paisa maneni shisem.
Wang-i ashiba agi, 12MP dual-camera keta aliba ‘Honor 8 Pro’ ya Indian fan tem atema deal tajungtiba lir. “6GB RAM aser 128GB ROM dena iba device nung chipset tajungtiba lir koba India nung consumer tem atema kanga tongtibang lir. Sen jenjang 29,999 lateta aliba ya ajaki saputsü ta imlar aser iba ya jangratema amshitsü imlar,” ta Wang-i ashi.