Human Resource development nung rangloktsüla: CM

April 20, 2017 nü Kohima Campus, RCEMPA Jotsoma nung Chief Minister, Dr. Shürhozelie Liezietsu 15buba Nagaland University Students Union Literary Day nung adentsü aruba noksa nung angur. 

Kohima, April 20 (TYO): Nagaland Chief Minister, Dr. Shürhozelie Liezietsu-i, lenla aika nung terenlok nüngdaka lir, ajisüaka Naga nunger atema tongtibangtibaji Human Resource Development nung rangloker inyaktsüla, ta ashi.
Tanep Kohima Campus, RCEMPA Jotsoma nung 15buba Nagaland University Students Union Annual Literary Day sentong nung tongti tesemdanger o jembidang Chief Minister-i, Naga nunger renloktsü atema nüngdakji human resource development lir, ta ashi.
Shisaliok nung terenlok dak sentakba nung pai, shisaliok agütsüdang tekalen mapatema kar sayutsüla, koba ajanga kaketshirtemi mapa atema sorkar dak dang menendaki sen aazüka parnok tebok mesüa litettsü, ta ashi.
Shisaliok tajung ngua tejakleni otettsü asoshi kaketshirtem, tsüraburtem, tesayurtem aser nüburtem longjemer amalitepa inyaktsüla, ta ayongzüka Chief Minister-i, “Shisaliok tapet angubaji senti lir aser lokti atema tajangzük asütsü. Asenoki shisaliok mapatong mebenokra aser kaketshirtem timi manitetra kaketshirtemji asen lokti atema khuret ka akumtsü,” ta ashi.
Dr. Shürhozelie-isa kaketshirtem dang, sorkar mapa angutsü atema dangbo degrees marishitsüla, kechiyong sorkar mapa nung tatembang ka tongogo, ta ashi.
Chief Minister-isa, Nagaland nung contract aser work-charge densema sorkar mapa nung nisung lakh 1.40 shi lir, ta metetdaktsü.
“Asen kaketshirtem nem shisaliok tajung aser job-oriented shisaliok agütsütsü atema shisaliok inyakyim nung asalentong tejangja alitsü nüngdak,” ta paisa ashi.
“Nüburtem nüngdak peritsütsü atema taoba mapang nungbo sorkari school aser collge aika lapoka liasü, ajisüaka tangbo sorkari kaketshirtem nem shisaliok tajung agütsütsü atema taliba rangloker inyaker,” ta paisa shisem.
Kasa sentong nung tetushi tejaoker, Pro Vice Chancellor i/c NU Kohima Campus, Prof. Buno Liegise-i, shingaia merenloki meliner saka taküm nung nükjidong tongner aser tejakleni oner, ta ashi.
Iba dak sentakba nung lai, “Iba nükjidongji ataloktsü atema asenoki zübazülema mesüra melung sür malitsüla, saka kanga süoki ia shisadangtsü nüngdak, iba den külemi asen tajungtiba agi meranga inyaktsüla,” ta ayongzük.
Laisa, 2017 küm atema University nung admission ji online ajanga dang agitsü, ta metetdaktsü.