Hungary EU nungi agientsüla: Asselborn

Berlin, September 13 (Agencies): Hungary linük European Union (EU) nungi mapang tatsüka mesüra teti atema agientsü tajungshiba olen ka Luxembourg Foreign Minister, Jean Asselborn-i tanü, Mongolbar nü metetdaktsüogo.
Europe nung tentetba linük balala nung jenoka alitsü asoshi Europe tonga aoer refugee aser migrant nisungtem junga anepalu masüba ken o nung ajemdaker, Asselborn-i Hungary linük EU nungi agientsü onükji tanü benoka liasü.
“Hungary ama refugee nisungtem pei linük telungi maitdaktsütsü nükjidong nung atsü atsür mesüra osangbener nem osangbentsü temeten magütsür linüktem EU nungi mapang tatsüka mesüra teti atema agientsü ajungshir. Yamaji inyakba ajanga dang EU tali lungjemtettsü,” ta Asselborn-i nenshia ashi.
EU nung züngsemba linük rong nung telatet refugee nisungtem yoka jenokdaktsütsü asoshi EU-i benokba onük anemer linük rong nung Hungary tesashitiba aliba aser par linüki Serbia o Craotia den arrtsülen atsü atsüa, refugee nisungtem par linüki maitdaktsüi nokdangba osang bushiteta lir.