Hurriyat lennirtem jungkai adoka sayuogo: Arun Jaitley

Delhi, October 25 (Agencies): Union Finance Minister Arun Jaitley-i Bodhbarnü ashiba agi, taoba küm asem tsüngda nung intelligence system ka kümtetogo, koba ajanga Hurriyat lennirtem sen agi teyari agütsüba kongdaktsüogo aser kiralongraba maparen atema sen teyari agütsüba inyakyim jungkai adokdaktsüogo.
“Taoba küm asem tsüngda nung intelligence network ka kümtetogo aser iba ajanga tang mezüngbuba Kashmir nunger tsüngdang Hurriyat temai adoka sayuogo. Parnok nem teyari agütsüba tera jungkai adoka sayuogo. Parnok nem teyari agütsüba tajemba kümogo aser iba ajanga longkaka aitba maparen kanga ajema kümogo,” ta pai osangbenertem dang ashi.
Paisa ashiba agi, police aser security agencies tem Jammu & Kashmir nung kanga kümdangshia inyakdar aser iba ajanga kiralongrartem sadema meinyakteter.
July ita NIA-i telungpur lenir parnok tenet puogo, aser item rongnung parnok trok Srinagar nungi, aser ka New Delhi nungi apu.
Kashmir nung ozüng alema maparen balala inyaktsü asoshi Pakistan nungeri sen teyari agütsüba dak sendakba nung bushisüngdangtsü atema May ita NIA puri Srinagar semdang, aser parnoki Hawala aser tanga lenmang ajanga sen belenshiba, aser saruba ken o dak senkdakba nung telungpur lennirtem dang tasüngdangba balala asüngdanga liasü.
Kasa mapang nung sorkari October 23 nü nungi tenzüka J&K nung telungpurtem densema lokti balala den jembishinü tenzüktsü, ta metetdaktsü, aser iba asoshi taoba intelligence chief Dineshwar Sharma, state atema pointsman shimtet.
Union Home Minister Rajnath Singh-i ashiba agi, iba jenjang ya Kashmir atema sorkar policy tejaklen bener aotsüba atema lir.
“Jammu & Kashmir nung tangatettep ka atema sensaksemtsü asoshi onoki telemtetba ka agiogo. India sorkar tenüng nung shilem agir ka ama Sharma-i lenisüba kübok J&K nung alirtem tejangraba aser taginüba angatettsü asoshi sensaksem balala akatsü. Pai MLA tem, political party, loktitentet balala aser pai nüngdaka ta bilemba nisungtem den ajuruteptsü,” ta pai ashi.
Telungpur lenirtem rongnung Hurriyat lenir Syed Ali Shah Geelani aser Mirwaiz Umar Farooq nunger amala, Pakistan nunger dang nungi Kashmir nung ozüng alema maparen balala inyaktsü asoshi sen tayari agiba dak sendakba nung aija tepoukdak yua aliba mapang ka nung iba jenjang ya sorkari agi.