Hyderabad-i Bangalore ajateta IT yimtiba kümner

Mumbai, July 17 (Agencies): Information Technology (IT) nung Hyderabad-i Bangalore meneptsü tetsüngda tuluka liaka tanü Telangana sorkari, taruba küm ishika tsüngda linük nung IT yimtiba Bangalore ajateta IT yimtiba akümtsü nükjidong nung inyaktsü, ta metetdaktsüogo.
“Taruba küm ishika tsüngda Information technology nung Bangalore ajateta Hyderabad ya temaba jenjangi tudaktsüner,” ta Telangana IT minister KT Rama Rao-i Mumbai nung osangbenertem dang ashi.
Pai ashiba agi, küm 20 jungnüa IT yimtiba Bangalore den toktepa aruba Hyderabad yimti ya tang linük IT export nung shilem 13 dang lir aser Garden City (Bangalore) shilem 31 lir.
Rao-isa, state-i mapatong tajungtem benoka tang IT export US sen billion 11 aliba nungi taruba küm pongu tsüngda anasü agi timba kümdaktsütsü nükjidong yur inyaker, ta ashi.
Paisa ashiba agi, Hyderabad nung IT nung inyaker nisung lakh 3.20 dak tema aliba nungi tesüiba ita 12 tsüngda mapa 15,000 tali bendenlokogo, aser ibaji linük nung tekaratiba bendenlokba lir.
Bangalore nung Infosys aser Wipro ama company aliba ajanga nüma tangteter aser Hyderabad nung Satyam aser Sify aliba ajanga nüma tangteta liasü, saka Satyam nung ochimashiba maparen jungkai adokba ajanga Bangalore jenjang kanga agi tajungba kümogo.