Hyderabad nung sen 2,000 note taila den nisung 6 apu

Hyderabad, November 26 (Agencies): Honibarnü Hyderabad anasa Police-i ozüng alema India sen taila amshir nisung trok den sen 2,000 notes taila sen lakh 2 dak tema apu.
Police-i sen 2, 000 note taila tejang 105 apu, aser iba senji tan ita sen 500 aser 1000 notes anentsüba sülen adokba sen liasü.
Parnok ket nungi police-i sen ajak agi 2,22,310 apu aser sen 2000 notes ji sen 2,10,000 liasü. Tanüngba taila senji sen 100, sen 50, 20 aser sen 10 notes liasü.
Police-isa shitakba sen 50,000 apu aser sen tailaji 2,000 note (105), sen 100 note (102), sen 50 note (105), sen 20 note (117) aser sen 10 note (102) apu. Ajakji senteper sen 2,22,310 liasü.
Parnok ket nungisa police-i colour Xerox machine ana aser sen 50,000 den tashishitsü aketba oset kar apu.
Hyderabad nungi kilometer 35 shi pilar Ibrahimpatnam police station kübok tesem ka nung police-i parnok apu, ta Rachakonda police commissioner ajanga metetdaktsü.
Osangbenertem den jembidang Rachakonda Commissioner of Police, Mahesh Bhagwat-i, par telok jagi sen ishika indang notes-a menüng tenzükba sülen takok anguba ajanga sen 2,000 notes-a menüng tenzük, ta metetdaktsü.
Tang pua alirtemji Jamalapur Sainath, G Anjaiah, S Ramesh, C Satyanarayana, K Sridhar Goud aser A Vijay Kumar nunger lir aser Kalyan o Srikanth nabo jenshia senzüdar.
“Sen 500 aser 1,000 notes anentsüba sülen tang pua alirtem jagi FICN (India sen taila) denomination tila menünga market nung prokshitsü lemtet. Sen 2000 note tasenba sayaba sülen parnoki ibaji menüng, aser market nung prokshitsü atema maongka ataa liasü,” ta ketdangserisa ashi.
“Parnoki market nung item senji prokshitsü lemtepa alidang police-i osang tejangja ka lazükba sülen police-i Ibrahimpatnam nung Ramesh’er ki mita ao parnok apu,” ta paisa ashi.