Hyperloop indang mezüngbuba test track France nung yanglu tenzükogo

Rongchii 14, 2018 (Agencies): US nung amendaker aliba Hyperloop Transportation Technologies (HTT) company puri Yangtepnü Toulouse, France nung parnok indang facility nung test track ana yanglu tenzükba metetdaktsüogo. Hyperloop ya Tesla CEO aser SpaceX ngutetsang Elon Musk-i tamasa purapitetba lir. Iba ya transportation aystem ka lir aser iba nung near-vacuum tube ka ajanga pod mesükba vehicle ka 1,100 km per hour aser iba dang nungi takaraba nung yoktettsü. Mezüngbuba shilem nung parnoki meter 320 lenmang ka yanglutsü aser iba ya taküm nungi amshi tenzüktsü. Iba den bendenloksema tanabuba full-scale system ya km ka talang asütsü aser ali nungi meter 5.8 pilar yanglutsü. Iba lenmang ya 2019 küm yangluzüktsü.
“Küm pongu tejakdang onoki transportation tsütsü tebilemtsütem; efficiency, comfort aser speed amala bentettsü asoshi tenzük. Tanü onoki iba nükjidong ya ataloktsü asoshi jenjang tongtibang ka agidar,” ta HyperloopTT CEO Dirk Ahlborn-i ashi. Iba system anaprongla ya maneni upgrade sütettsü aser HyperloopTT o parnok den partner company temi amshitsü. “Onoki iba techonology ya tenzük aser alima nung reinsurance company tulutiba Munich RE-i puri iba ya insure sütettsüba project ka ta agizükogo. Onoki linük teku den tesendaktep yangludar,” ta HyperloopTT mendenbuba Bibop Gresta-i ashi.
HyperloopTT company puri US, India, Slovakia, Abu Dhabi, Czech Republic, France, Indonesia, Brazil aser Korea den tezüngzüktepba yangluogo. India nung mezüngbuba Hyperloop transportation facility ya Andhra Pradesh nung amenoktsü aser iba ajanga Vijayawada o taruba state capital Amaravati na sendakteptsü. State sorkari iba project ya asadangdar aser iba ya mapa küma inyaka ora iba yimti ana tsüngda km 40 ya minute 6 nung oa atongtsü.
Hyperloop line ya tembanga yanglura nüburtem Bengaluru nungi Chennai minute 20 nung atongtsü. Mumbai nungi Chennai tashi Bengaluru ajanga km 1,102 ya minute 50 nung ayimjemtsü.