I-Day anogo nung Assam, Manipur nung bomb 7 apok

Guwahati, August 15 (Agencies): Hombarnü Independence Day anogomung nung telungpurtemi Assam nung bomb pongu aser Manipur nung bomb ana pokdaktsü, saka nisung yiruba mesüra asüamaba maliasü.
Paresh Baruah’er telok United Liberation Front of Assam (ULFA)-i Assam nung Tinsukia aser Sivasagar district na nung tesem tezülen bomb pongu pokdaktsü aser Manipur nung bomb anaji state yimtiba, Imphal nung apok.
Taoba hopta ULFA densema Northeast nung telungpur telok 12-i senteper tesem nung Independence Day nung shilem magitsü sangdonga liasü.
Hokolbarnü Tinsukia district nung ULFA Hindi oshi jembir nisung ana tepsetba sülen tanü kasa district nung bomb apoker.
“Mulung malemba ULFA telungpurtemi tesem tezülen item bomb pokdaktsü. Parnoki amaktsü tebilemba maliasü, iba ya parnok aliba metetdaktsütsü atema inyak ama reprangteter,” ta Assam Director General of Police (DGP), Mukesh Sahay-i osangbener dang ashi.
“Ajisüaka onoki iba tatalokba ya pungbapungba magir. Onoki sepai tali yoktsü aser tim meyiptsütsü,” ta paisa ashi.
Chief Minister, Sarbananda Sonowal-i, telungpurtemi lendong tulu magütsütettsü, kechiyong state tesem ajaklen security sepaitem akangshiogo. Nüburtem kümzüka alitsüji par sorkar teinyaktsü tongtibangtiba lir, ta ashi.
“Parnoki (ULFA) tamakok nguogo aser iba kuliji nüburtem longsoa benjung (I-Day) nung shilem agiba ajanga sayur,” ta Chief minister-isa ashi.
Finance Minister Himanta Biswa Sarma-ia, “Nüburtem tsübudaktsütsü aser ki telung nungi maludaktsütsü atema parnoki bomb pokdaktsü, ajisüaka parnoki kidang nungi alu. Nüburtemi telungpurtem sendok kechiyong parnoki state nung tesünep aser terenlok aginer,” ta ashi.