I-Day jakdang Pakistan-i India nunger tepoukdak alir nisung 30 chiok

New Delhi/Islamabad, Luroi/August 13 (Agencies): Pakistan nunger Independence Day nüngtem nung tanü Pakistan-i tepoukdak alir India nunger 30 chiokogo; parnok rongnung angopur 27 densema lir.
Foreign Office otongdar, Mohammad Faisal-i sangdong ka ajanga, tepoukdak alirtem chiokbaji Pakistan-i meimchirtem onük nung yimtenren maitdaktsüba mapatong den sendaktepa lir, ta metetdaktsü.
“Luroi/August 14 nü Pakistan nunger Independence Day nüngtem nung iba ya mapa tajung ka sayuba lir. Yamaji India nungeria kasa inyaktsü onoki imlar,” ta paisa metetdaktsü.
Sorkar osang ajanga ashiba agi, tang Pakistan nunger tepoukdak balala nung angopur 418 densema India nunger 470 dak tema puoka lir.
Yashi osang ka ajanga, India nunger angopurtemi Pakistan nunger tzü adena aruba agi ketdangsertemi angopurtemji pua lir, ta sangdonga liasü.
Parnokji Karachi nung aliba Malir jail nungi Cantt Railway Station-i anir ogo; aser iba nungjagi Lahore-i anir aoba sülen Wagah arrtsü nung India nunger ketdangsertem ket nung agutsütsü.
Arabian tzüyim nung arrtsü tejangja maliba den külemi angopurtem ket nung tesem jangjatsü atema technology oset maliba ajanga Pakistan aser India napronglai angopurtem apur.