I-Day jilia NE state tem nung kümdanga alitsü sangdongogo

Imphal, August 11 (Agencies): Telungpurtemi Independence Day nung shilem magitsü sangdongba sülen northeast state pezü nung tekümdangtsü sangdongogo, ta Mongolbar nü Home ministry ketdangser kati ashi.
“Parnoki (telungpurtemi) Manipur, Nagaland, Assam aser Arunachal Pradesh nung Independence Day benjungmung amungba nung timtem agütsütsü merangtsü akok ta onoki meteta lir. Ibayongji telungpurtem nokdangtsü atema onoki security sepaitem akhangshia mapa lemzüktsüogo,” ta ketdangseri ashi.
NE nung telungpur telok pezüi Independence Day nung shilem magitsü ayongzükogo aser August 15 nü ayaterm 12:00 ako nungi nikongdang 6:00 ako tashi general strike ka ayongzüka lir.
Telungpur telok pezü jagi shilem magitsü atema sangdongji külem sangdong ka ajanga media aika dangi e-mail süogo.
Iba tayongzükba ya United National Liberation Front of WESEA (UNLFW) nung adenba- NSCN-K, ULFA, NDFB aser Kamtapur Liberation Organisation & Coordination Committee (CorCom)-i agütsüba lir.
Independence Day benjungmung mapang NE nung telungpurtemi timtem agütsüba nokdangtsü atema army, police aser paramilitary sepai merirjang aika renema lir.