I-Day jilia Srinagar nung security akangshir

Srinagar, August 14 (Agencies): Hombarnü Independence Day benjungmung amongtsü lia tang curfew ozüng benoka aliba Jammu and Kashmir meiwa yimtiba, Srinagar nung security tashi itshiogo.
Jammu & Kashmir nung Independence Day tongti sentongji Bakshi Stadium nung akatsü, ibayongji Srinagar yimti tesem ajaklen security sepaitem tashi itshiogo.
“Bakshi stadium-i aoba gari lenmang ajak nokdangogo aser asüng bejungmung tesünep nung katettsü atema security sepaitem aika lemzükja lir,” ta police ketdangser kati tanü metetdaktsü.
Independence Day benjungmung nung tsükchirtemi amaktsü indang Intelligence osangbo mali ajisüaka lendong mataloktsü atema security akangshiogo, ta ketdangserisa  ashi.
India sepaitemi Jammu & Kashmir nung Hizbul Mujahideen commander, Burhan Wani tepsetba sülen July 9 nü nungi tenzüka Kashmir nüburtemi longkak aitba ajanga tensa mejungi akum, ibayongji  state nung mobile telephone aser Internet services anenja lir.
Telungpurtemi lendong agütsütsü aliba nokdangtsü nükjidong nung tesüiba mapangtem nunga Independence Day aser Republic Day benjungmung nung mobile phone aser mobile internet ghonda ishika atema anenja liasü.