I-Day matongdang Isis-i Assam amaktsü akok

Guwahati, July 25 (Agencies) : Tanü-asüng kiralongraba mapa inyaker telok rongnung teyakyakba Isis-i India kübok Assam amakatsü tenük yoker.

Isis teloki Assam amaktsü atema tasa atonga lir, ta itdangitrirtemi metetdaktsüogo.

Itdangitriba teloktemi Union Ministry dang Independence Day matongdang Isis-i Assam amaktsü akok ta kümdanga alitsü osang metetdaktsüogo aser külen Assam state ketdangsertemi kiralongraba mapa anema raratsü renema lir ta temulung lemteta shiogo.

“Union Home Ministry-i Assam nung lendong ataloktsü tesem kar ajitetogo. Iba dak sendakba nung August 1, 2015 nü senden ka alitsü ayongzükogo. Onoki kiralongrar telok mashi ka anema araratsü renema lir” ta Assam Home Commissioner & Secretary, LS Changsen-i osangbenertem dang ashi.

Assam dak alia ano Isis-i amaktsü akok ta arentaka bilemba state temji, Karnataka, West Bengal, Tamil Nadu, Uttar Pradesh, Maharashtra, Andhra Pradesh, Kerala aser Jammu & Kashmir nungertem lir.

Item state sorkar tem dang Centre-i security akangshitsü atema tetuyuba agütsüogo.

Assam nung kiralongraba mapa aika inyakogo aser item rongnung tulutibaji 2008 küm atalok. Iba mapang ULFA-i Guwahati, Bongaigaon, Kokrajhar aser Barpeta Road nung bomb 18 jungnüa apokdang nisung 80 asü aser noklang aika yiru.