I-League: Aizawl FC-i 1-0 agi East Bengal akok

Aizawl, February 20 (Agencies) : Hombarnü nü Rajiv Gandhi Stadium, Aizwal nung I-League 10buba round asayadang Aizawl FC-i par asaya moapu nung maneni takok nguogo. Parnoki 1-0 agi East Bengal madak takok angu.
Aizawl telok nungi Ashutosh Mehta melena aitsang R. Laldanmawia-i asaya tenzüker minute 58buba nung par telok asoshi goal kaji yoka tanü asaya nung takok angu.
Parnoki tanü akokba ajanga, asaya 10 asayaba nungi Aizawl-i point 20 ngutetogo.
Parnoki point metsür kaka (21 each) ngua temaba jenang nung külemi aliba team tem, Kolkata giants, East Bengal aser Mohun Bagan meneptsü point ka ang nüngdaka kümogo.
Aji oda süaka Mohun Bagan-bo tang tashi nung ano asaya toku (9) ang asaya lir koba East Bengal tang nungi asaya ka agi tajemba lir. East Bengal-i Hombarnü makokba ajanga tan I-League asayamung nung parnoki khen tanga tamakok mangu aliba otsü raksaogo.
Tan iba asayamung nung khena tamakok mongudanger telokji Mohun Bagan telok ang lir.
Tanü asaya tenzüker minute asembuba nung Haiti nunger Wedson Anselme-i tetsüng abelen nung ball ka kenoktsüba goal post nung tsükdakba ajanga Aizawl FC goalkeeper Albino Gomes temulung alii alu.
Ajisüaka asaya aoba mapang Aizwal team-i kanga junga asayatsü tenzük aser parnoki kinük anatsülen nungi lua makbangtsü merang.
Mezüng asaya tesadang atongtsü anasa Brandon-i metsüoktsüba ball ka Bukenya-i Laldanmawia nem kanga junga agütsü ajisüaka pai iba ball ji melamela goal yoktsü melena goal post temalen metsütok.
Minute 43buba nung Kamo-i box telung nung ball ka agizük, ajisüaka Bukenya-i rakzük.
Anungji asaya tesadang tashi shingaia goal meyokteti tembang.
Ajisüaka tanabuba tesadang tenzüker minute ishika lir külen Aizawl-i goal ka yoka parnok jenjang tajungba aküm.
Abelenlen nungi Jayesh Rane-i agütsüba ball ka Laldanmawia-i East Bengal goalkeeper T.P. Rehenesh alema kenoktsüba ajanga parnoki iba takok ngutet.
East Bengal-i kanga meranga asayadang ajisüaka Aizawl defence temi kanga junga nokdang.
East Bengal nungi striker Robin Singh-i goal ka yoktsü maongka ngutet, saka pai tekolak agi tongoktsüba ball ji Albino-i indangindanga pushi.
Asaya tatembangtsütsü East Bengal team-i kanga junga asayaba ajanga Aizawl FC pur kanga pettepdaktsü, saka tatem nung parnoki takok angu.