I-League: Bengaluru-i 2-0 agi Shillong Lajong akok

Shillong, April 15 (Agencies) : Honibarnü I-League asaya ka nung Bengaluru FC-i 2-0 agi Shillong Lajong madak takok angu.
Bengaluru FC captain, Sunil Chhetri-i minute 26 aser par telok nungi Harmanjot Khabra-i minute 49 bubatem nung goal kaka yok. Tanü iba takok anguba ajanga asaya 16 asayaba nungi par teloki points 24 ngutetogo.
Bengaluru FC telok Shillong-i marudang northeast nungisa, Aizawl FC nadak par moapu nung koka liasü.
Iba asayamung nung jenjang asembuba rongnung denera Lajong kanga meranga asayatsü nüngdaker. Parnoki tang point 24 ngua lir aser jenjang pungububa nungang lir.
Tanü asaya tenzüker minute 20 tsüngda nung Lajong-i goal yoktsü maongka tajung ana tashi magitetba ajanga iba tamakok angu.
Bengaluru FC nungi defender tar talang asem ; Juan Fernandez, John Johnson aser Ranjan Singh nungeri Lajong forward tem anasa alutsü kanga saaka kümdaktsü. Par asem jagi Lajong nungi kanga junga asayasang Dipanda Dicka balaka kanga junga nokdangtet.
Bengaluru FC-i goal anabuba yokba sülen ano par telok nungisa Alwyn George-i metsüba ball ji tera agi goal mai, mesüra iba asaya parnoki 3-0 agi akoktsüba liasü.