I-League: Mohun Bagan aser Shillong Lajong nati akok

Chennai/Shillong, January 21 (Agencies) : Honibarnü Chennai nung Sony Norde-i asaya tatemtsü lia goal ka yokba ajanga Mohun Bagan-i 2-1 agi Chennai City madak takok angu.
Norde-i iba asaya mezüng tesadang nung nung penalty ka metsüpet, saka tesüsa goal ka yokba ajanga Bagan teloki iba asayamung nung pezüben buba atonga atonga koka point 12 ngutetba ajanga Bengaluru FC dang point 3 agi timba küma tang temaba jenjang nung lir. Iba sülen parnok East Bengal den Honibarnü asayatsü.
Chennai nungi Brazil nunger asayar, striker Marcos Tank-i minute 52buba nung goal ka yokba ajanga parnok jenjang junga aküm, ajisüaka iba goal yoker minute 4 ang lir külen Bagan telok nungi Jeje-i goal ji azüdok aser ibai pa atema tan asayamung nung goal asembuba lir.
Iba sülen Haiti nungi football asayar Norde-i minute 77buba nung goal ka yokba ajanga par teloki takok angu.
Ano külen Shillong Lajong FC atema Rupert Nongrum aser Cameroon nunger Aser Dipanda Dicka nati goal kaka yokba ajanga tan asayamung nung parnoka mezüngbuba point nguogo. Parnoki Minerva Punjab FC madak 2-1 agi takok angu.
Minerva Punjab FC telok nungi Loveday Okechukwu-i goal ka yok. Ibai Shillong Lajong pur atema pei tesem nung mezüng asaya liasü aser parnoki iba maongka agiteta jenjang tenet tongogo. Parnok ano January 28, 2017 nü Mumbai FC den sayatsü.
Pune nung Churchill Brothers FC aser DSK Shivajians na draw asü. Ibaji ajanga Churchill Brothers FC-a mezüng point ngutetogo. Asaya mezüng tesadang minute 21buba nung DSK Shivajians nungi forward nung asayar, Korea nunger Kim Song Yong-i par telok atema goal kaji yok ajisüaka asaya tatemtsü anasa minute 86buba nung Churchill Brothers FC nungi Adil Ahmed Khan-i goal ka yoka telok ana tsüngda 1-1 lia asaya tembang.