I-League: Mohun Bagan-i 3-1 agi DSK Shivajians madak takok angu

East Bengal den points saku kümogo

Kolkata, February 18 (Agencies) : Tang tasayadak I-League nung Honibarnü Rabindra Sarovar Sadium nung Mohun Bagan nungi Balwant Singh-i minute ana tsüngda nung goal ana yokba ajanga par teloki DSK Shivajians madak 3-1 agi takok ngua iba asayamung nung temaba jenjang nung aliba telok East Bengal den points saku kümogo.
Mohan Bagan nungi Milan Singh minute 33buba nung goal ka yokba sülen Balwant-i minute 42 aser 44 bubatem nung goal kaka yokba ajanga par teloki iba takok angu.
DSK Shivajians nungi Yusa Katsumi minute 89buba nung goal ka yok ajisüaka Mohan Bagan aoksaa mebilem.
Bagan-i asaya 9 asayaba nungi tang tashi nung points 21 nguteta lir aser Shivajians-ia 9 ben asayaba sülen point 10 nguteta jenjang trokbuba nung lir.
Kolkata nungi train nung meyipa aoba mapang train tsükokba lendong nung densema Bagan teloki nungi asüsang bilemteta minute ka süngjema nokdakba sülen iba saya tenzüka liasü.
Parnoki asaya tetenzük nungi kanga junga asayatsü tenzük.
Minute 18buba nung Bagan pur free kick ka angu saka tia makai goal meyoktet.
Bagan telok nungi defense nung nisung trok mesüra tenet nokdakba ajanga midfield nung tashi tera mait aküm.
Ajisüaka asaya tesadang sülen nungibo parnok kanga tashi ita asayatsü tenzüka tanü iba takok tulu angu.