I-T-i Karnataka nung minister ki mitdang sen crore 11 apu

Bengaluru/New Delhi, August 03 (Agencies): Saru magütsüba dak sendakba nung Income Tax department-i Karnataka nung Energy Minister, DK Shivakumar aser pa den inyakertem ki mita aodang tang tashi nung sen crore 11 puogo.
Brihostibarnüa IT-i tesem aika mita ao aser iba mapang nung parnoki documents, account books aser financial papers aika puogo.
Delhi nungi sen crore 8.33, Bengaluru nungi sen crore 2.5 aser Mysuru nungi sen lakh 60 shi puogo, ta ketdangser kati ashi.
“Tesem balala nungi sen crore 11.43 shi puogo. Maneni mita odar,” ta ketdangserisa ashi.
I-T department-i Shivakumar dak sendakba kiojen 64 tashi mita ogo.
Gujarat nung Rajya Sabha election agitsü lia BJP pur nem memesüzükdaktsütsü atema Congress MLA 44 Bengaluru tezülen aliba Eagleton resort nung anidena lir, aser ibaji pai ketdangsüa inyaker.
Shivkumar indang kiojen mita aoba anema Brihostibarnü nikongdang Karnataka nung Congress-i, Centre sorkari nija tashi amshir aser democracy tepseter ta aija longkak aitogo.
2013 küm Assembly election mapang nung Shivakumar affidavit ajanga ashiba agi, pa indang kiojen ji sen crore 251 jenjang shi lir.
Arishi küm 55 Shivakumar ya Congress Party nung bangdak lenirtem den tesendaktep junga lir aser trokben tashi MLA lir aser pa chief minister akumtsü nükjidong lir.
Par ki mita aoba anema yashi Parliament nung rongrong tulu adoka liasü.