IAAF-i Russia nem temerenshi agütsür

London, November 14 (Agencies): Alima ajunga nung athletics ketdang asüba tentet, International Association of Athletics Federations (IAAF)-i Russia alima athletics aser field sabang nung shilem magidaktsütsü temerenshi yashi, Hokolbar nü agütsüogo.
IAAF Tir, Sebastian Coe-i ayonger külen, IAAF luden-i yashi ghonda 3 shi agia teleconference agiba sülen Russia merenshitsü asoshi vote 22-1 ngua Russia merenshitsü lemtet.
Kasa senden nung Russia züngsemtem nembo vote agütsütsü temeten magütsüba osang jangjaogo.
“Russia nunger athlete-tem aser All-Russia Athletic Federation (ARAF) na tsüngda tangatettep yur külen asayartemi tali tashi itshitsü asoshi ozüng alema mozümora achibaren mepui parnok tetoktepba balala nung shilem agidaktsüba osang bushitetogo aser ibayongji, Russia merenshitsüla,” ta World Anti-Doping Agency (WADA)-i tan Hombar nü osang benokba sülen IAAF sendenji yashi mena liasü.
Aji oda, Russia-i par inyaksangi tajungba küma melenshiba kuli tejangja mongutet tashi par linük nem agütsüba temerenshi ya magientsü asoshi tan renemogo.
“Russia-i nungdakba temelenshi agiba kuli tejangja anguba sülen ang par asayartemi international sabang nung tanaben toktepa shilem agitettsü,” ta Coe-i osang jangjashitsü.
Yimtenren tajangzük angutsü nükjidong nung masü saka saisapongtsüren merüktettsü nükjidong nung tan Russia nem temerenshi ya agütsür ta pai shisem.
Brazil nung sangküm, 2016 küm asayatsü ayongba Rio Olympics tenzüktsü ita 9 dang anünga alidang Russia-i tan temerenshi ya angur lir.
Tan temerenshi anguba yong Russia asayartemi Rio Olympics nung shilem agitsü temeten mongtutetba den külemi, par linüki 2016 World Race Walking Cup aser 2016 World Junior Championships tetoktepbarena mayongtettsüsa tan jenjang tamajung ajurur lir.
Russia asayartemi taruba December ita 13 nü nungi tenzüka France nung agitsü ayongba European cross-country championships nunga shilem magitettsüsa jenjang tan angur lir.
Athletics aser field shilem nung temaba jenjang abener, Russia-i London nung ayongba 2012 Olympics nunga United States sülen anidaka, track aser field na shilem nung medal timba angur linük tanabuba akümba osang bushiteta lir.