IAF airstrike ajanga India nunger aika jashiba küpzükogo: RSS

New Delhi, February 26 (Agencies): Tanep Indian Air Force (IAF)-i Pakistan nung kiralongrartem camp amakba dak sendakba nung Rashtriya Swayamsevak Sangh (RSS)-i, Pulwama nung kiralongrartemi amakdang CRPF sepai 40 tepsetba ajanga India nunger jashidaktsü, ta ashi.
Tanep Pakistan nung kiralongrartem amakba atema Indian Air Force aser sorkar na nem tenüngsang agüja RSS-i, tayimtsü ajanga amakba ajanga India nunger million aika jashidaktsüba küpzükogo, ta ashi.
BJP indang tentet RSS-isa, tayimtsü ajanga amakba ya “Bharatiya sobaliba lir” kechiyong iba ya non-military inyakyim ka liasü, ta ashi.
RSS-i sangdong ka ajanga, “Pulwama nung Jaish-e-Mohammed kiralongrartemi amakba ajanga linük nübur ajak jashidakja liasü. Tanü Indian Air Force-i Pakistan nung amenoka aliba JeM indang camps makdokogo. Onoki India sorkar aser Indian Air Force nem tenüngsang agutsür, kechiyong parnoki India nunger million aika jashiba küpzükogo,” ta metetdaktsü.
Tanep Foreign Secretary, Vijay Gokhale-i, tayimtsü ajanga amakba ya “intelligence ajanga, military inyakyim ka masü aser tsükchirtemi amaktsü aliba nokdangba ka liasü” ta metetdaktsü.
Pulwama nung kiralongrartemi CRPF sepaitem aika tepsetba sülen RSS-i aibelenertem anema mangyangtsü takhangba agüja liasü.