IAF-i medical osettem bentsür aruogo

Dimapur, March 30 (TYO): Hombarnü Delhi nungi Covid 19 dak sendakba medical equipment tem Dimapur airport tonga bener aruogo.
Iba ya State Health & Family Welfare department aser NSDMA nüngdakba osettem lir.
Tanü tayimtsü ajanga bener aruba osettem rongnung ventilators, Personal Protection Equipment (PPE), Mask, Gloves, Sanitiser dena lir.
Hindon Air base nungi 77 squadron (special Air operations) indang C130 J super Hercules tayimtsü ka nung tonne 8 shi touzük medical osettem bentsür aru.
Iba tactical airlift aircraft ya special forces tekaratiba nung anir aotsü atema amshir aser runway mashi ka nung anenzüktsü akoker.
Nagaland state indang medical osettem abenba den külemi iba tayimtsü nung Manipur sorkar meyong ton 5 medical osettem bena liasü aser ibaji tongtsütsü atema Dimapur nungi Imphal airport-i apusoa ao.
State sorkar ketdangsertem, Dimapur nung project office (IAF), HQ EAC Shillong, Air Hq (VB), MoD aser DRC, Nagaland house, New Delhi nungertem ajanga tanü IAF indag tayimtsü ajanga medical osettem bener arutetogo.
Iba asoshi Nagaland state sorkari IAF dang pelaba metetdaktsüogo.
Taoba mapangtem nunga IAF-i State disaster management relief, civil administration indang missions aser aid maparen nung yaritepogo.