IAF indang samaba AN-32 tayimtsü tang tashi menguteter

July 23, 2016 nü Arakkonam nung aliba Naval Air Station, INS Rajali nung Navy ketdangsertemi Defence Minister, Manohar Parrikar dang AN-32 tayimtsü samaba bushiba maparen indang rasa-a ashiba noksa nung angur. 

Chennai, July 23 (Agencies): Yashi Bay of Bengal nung Indian Air Force (IAF) indang tayimtsü ka samaba sülen tanü agi anogo ananübuba iba tayimtsü maneni bushidar.
Yashinep IAF indang AN-32 tayimtsü nungji nisung 29 mener Chennai anasa aliba Tambaram air base nungi Andaman & Nicobar Islands nung Port Blair-i aotsü apusoa liasü, ajisüaka 9:12 ako meta iba tayimtsü ‘radar’ nungi sama.
Iba tayimtsü radar nungi samadang tayimtsüji Chennai anüdoklen nungi kilometer 280 shi pilar liasü.
Osang ajanga angazükba agi Navy aser Coast Guard indang rong 12-i tesem babala nung aonung piyong tayimtsüji bushia liasü.
Samaba tayimtsü bushiba operation achaayangtsü atema tanü Union Defence Minister, Manohar Parrikar-a Chennai yimti tonga aru.
Union minister yimti tonga aruba sülen pa Tambaram nung tayimtsü ka nung ayaketa apusoba sülen anünglen nungi search operations repranga liasü.
Yashi Parrikar-i, “Samaba tayimtsü ji tang tashi menguteter. Tayimtsü den yangji mena aliba sepaitem ngutettsü atema akokba tashi agi meranga inyakdar,” ta metetdakja liasü.
Tayimtsüji anünglen feet 23,000 nungi alileni jizüka alu südi, ta melung melemi bilemdar.
Pilots nungi tesüsabuba call ji tayimtsü apusor minute 16 nung agizüka liasü. Iba mapang nung pilot kati, ‘ajak junga dang lir’ ta ashi.
Tayimtsü nung alir parnok 29 rongnung pilot ana den navigator ka densema crew züngsem trok, ketdangser ka densema IAF sepai 11, Army ana, Coast Guard nungi ka aser navy nungi parnok 9 lir.