IAF tayimtsü nung medical supplies bener China-i apusoa ogo

New Delhi, Tsüklai/February 26 (Agencies): Bodhbarnü Indian Air Force (IAF) tayimtsü ka nung medical supplies kg 15,000 bener China nung coronavirus tashidak agi mejungi kongshiba yimti, Wuhan-i ogo, ta sorkar osang ka ajanga metetdaktsü.
C-17 military tayimtsü nungji India nunger 80 den kidanger linüktem nungi nisung 40 anisemer meyipa anir arutsü, ta sorkar osang ka ajanga metetdaktsü.
Taoba hopta India-i, Wuhan nungi India nunger anir arutsü atema tayimtsü aotsü asoshi China-i metetsümonga temelaba magütsür, saka tanga linüktem nembo temelaba agütsür, ta aija liasü. Ministry of external affairs-i sangdong ka ajanga, India-i China nem medical teyari balala agütsüba ajanga China-i coronavirus anema raraba nung yaritsü, ta metetdaktsü.
World Health Organisation (WHO)-i, coronavirus ya ‘Public health emergency’ lir ta sangdongogo.
Ministry of external affairs-isa, IAF tayimtsü nungji masks, gloves aser tanga medical osettem densema medical supplies ton 15 (kg 15000) bener ogo, ta metetdaktsü.
MEA-i sangdong ka ajanga, “India aser China na tesendaktep yanglur taküm küm 70 ajungba mapang nung tembar temaitsü sayuba den külemi India nungeri China nunger atema aria bilemtsüba temaitsü sayua tanü item teyari (medical supplies) yoker,” ta metetdaktsü.
Chjina linük nung nisung 78, 064 dak coronavirus tashidak putetogo aser nisung 2,715 süogo.
MEA-i, “IAF tayimtsü nungji India nunger aser kidanger linük kar nungi bendangertem densema anir arutsü,” ta metetdaktsü.
IAF tayimtsüji Brihostibarnü meyipa arutsü.
February 8 nü Ato kilonser, Narendra Modi-i shidi ka ajanga China Tir, Xi Jinping dang, India-i China sorkar aser nüburtem atema aria bilemtsür, ta lemsatepa liasü.
Modi-isa iba tensa anema raraba nung India-i China yaritsü asüngdangba den külemi iba tashidak ajanga nisung jenti asüba atema mangyim jashi lemsatepa liasü.