IAS officer ka ochima ken o dak sendakba nung apu

Guwahati, Aenjeti 9 (Agencies): Assam police-i state Social Welfare department kübok sen crore 2250 ochimeshi amshiba dak sendakba nung IAS officer Kumud Kalita puogo.
Taoba mapang nung Assam police-i Kumud Kalita aliba tesem indang osang tejangja agütsür nem sen lakh 1 senpet agütsütsü asoshi nangzüka liasü. Kumud Kalita ya iba department nung director ka ama tenzüka liasü.
Iba IAS officer ya senotsü ochimeshi amshiba dak sendakba nung mapa nungi anentsü.
Assam CM tetuyuba nung Vigilance aser Anti Corruption puri sen crore aika ochimeshi-i amshiba dak sendakba nung ken o ka benoka liasü.
Taoba Chiteni (July) 28 nü iba investigation agency yagi tanga IAS officer Dilip Borthakur (taoba Social Welfare department Director) kasa ken o dak sendakba nung apu.
Vigilance aser anti corruption department puri iba ken o dak sendakba nung nisung 11 aitsüogo.
Bushisüngdanga aoba mapang nung taoba Congress sorkari yimsüsüba mapang nung küm 15 tashi küm shia sen crore 150 social welfare department nungi ochimeshi agizüka achiba ngutet
Kasa bushisüngdang ajangasa ICDS list nung tanur tenüng taila lakh teku inoksema aliba ngutet.
IAS officer sang ya iba keno nung aija lir aser pa yaküm küm Tsüklai nungi samara mongui bushia liasü.
Iba keno bentetba ya state police atema takok tulu lir aser BJP sorkari ochimashi ken o bentettsü merangba nung jenjang tasenka aser takok tajung ka lir.