IB züngsem Hepong Phom süogo

Dimapur, March 28 (TYO) : Tesüiba mapang Interim Body Member aser Phom tesem nungi mezüngbuba regional council member, M. Hepong Phom mapang tatsüka shiranga aliba sülen, Mongulbar nikongdang Dimapur nung iba lima nungi pilaogo. Pa arishi küm 102 liasü.
Pa asüba osang angashia state chief minister-i, “Hepong Phom asüba angashia temulung shiranger,” ta sangdong ka ajanga lemsatep.
Chief minister Dr Shurhozelie Dezietsu-i, Hepong Phom ji Interim Body Züngsem liasü. Pai India nung Nagaland-a state 16 buba akümtsü asoshi inyaktepdang tetsükdangtsü aser tenokdangba aruba ajak kokteta State kümdaktsüba nung yaria liasü, ta ashi.
1961 nungi 1963 kümtem nung State tensa koma liasü ibaji tang aliba lanu putuibo bilemaka moutettsü. Nisung 45 agi akümba Interim Body nungji kin ajak nungi züngsem züngoka liasü. Parnoki Nagaland atema inyakdang anüngdang kibong den jangaratema memungtet aser aonunga Assam Rifles tesep nungsa jenok. Parnok karbo pei kümsük matongdang khaset aser karbo kümsük agi tonga anisüngzüker lia khaset, ta pai ashi.
Chief Minister-i, Hepong-i kodanga tasü mait mebilem aser pa tajungtiba agi Naga nunger tenzük. Küm 50 lir külen Interim Body nung inyaka arur, taküm alirtem 2013 küm ajurutepdang nisung kari Nagaland state ya azü, nüktzü aser taküm tenla agi alizük aser Nagaland ya asen shisatsü aser temulung ajak agi kanga meimer ta ashidang, Hepong tejak nung nüma danga menüremba angu, ta ashi.
Parnok senteper asen ayak wazüka ayu aser Naga nunger tejakleni anitsüji parnok nükjidong liasü. Anungji Naga nunger ajaki mapang tatsüka Nagaland Statehood atema inyakertem, Wb. Hepong-i den ano tangartemi inyakba bilemteta akhümtsübu agütsütsü tetemsü, kechiba süra parnok ajanga asenok tang aliba jenjang ya tongtet, ta paisa ashi.
Naga nunger ajak aser Nagaland sorkar tenüng nung ni asür kibong den asüku lemsateper aser iba ama temulung zürep tia nung alidang Tulusang Tsüngremi nenok nem anisüngzük agüjangma. Tsüngremi asür tanela teti anisüngzükdak yujang ta ni sarasademtsür.