Iba lima nung sen tashi ya ulura kümogo, oda sen tashi agi makoktsüsa maparen aikabo malitsü südi

~  R. Imkong Lkr, 4th Mile, Diphupar.

Tanü iba lima nung reprangdangyonga ora asen meimchirtem aremzüa aliba jaka ya sen tashi agi makoktsüsa maparen aikabo malitsüang südi. akidang mapang nung school class ishika azüngba nüburtem tu tanübo Minister, Director, Secretary kümer office tulu aika nung tekolak ser menden tajung nung amenertem tu aika süadokogo; aser ano tanüa ishikabo teinyakdakpurtem lir. Item purtem jagi annir tanübo joko degree tulu anguba purtem aika maparen tapu balala nung kar tekolak menden nung amen, aser kar pei yari mapa tajung ngur inyakyonga odagi. Item purtem jagi Tsüngrembo metet aser iba tamangba yimsü nungji temulung tesadangkabo Khristan ta tenüng agir mesüra jar inyakyonga aoba angur. Kechiyong parnoki temeshi laishiba nung shia aliba ama temenenpur ajak molumi nung enoka arungtsü ta ashibaji tatem nungbo shidak ataloktsü alitsü ta amanger saka iba lima nung tulur aser takartemi annir aremzüa aliba nisungtem ajaki alima rongsen penpur, yamaji ajaki takar aser tulur kümner tesa angur, saka ariteper ajaki takok tajung mengutetba ama ajakibo tulur aser takar mekümteter. Kechiba alima nung alir nisungtem ajaki tulur aser takar mekümteter? Hau ni, alima nung alir nisungtem ajaki tulur akümtsü yabo kanga temelabo masütsü ta angateter. Saka pai mesüra lai ali rongsen agi tila tari “job” post karbo alitettsü akok, saka post tulutembo mela melabo malitet-tsü, kechiba ta süra “ordinary” mesüra mamuli nisung ka nem post tulu S.D.O (Civil) mesüra police department nung Deputy Commandant post amala ka agüjaka item jagi meinyaktettsü. Kechiyong pa mesüra la dak ibala ama mapa ajet-tsüsa sempet tajung melira nüburtemi nunga ta ashitsü, aserbo item jagia anogo ka-ta menokdaktettsü. Saka takar akümtsü yabo shirnok ochimashi, tekelak, ampangyim, meru-meru aser kehn agi sensaker dang taochi mesayutetba tekuru nisungtemi mapang tatsüka tsüngda nung takar nisung ka kümtet. Yamaji item amala ket nung shibai iba osep ya zulur paa aiben timtema aruogo aser ano maneni timtemdagi, aser ano tangartema sensaker tashibo yamajisa timtemdagi. Saka tatem nungbo Amos tapu 8:4,6,7,8,9 nung shia aliba ama ataloktsü, aser parnoki sensaker dang taochi temeim mesayutetba ama iba anogo nungji ataloktsü, anungji iba asoshiji renema alitsüla.
Saka nisungtem rongnung shirnoki maparen ajak nung temeim taochi lia aser tebilemdang kaa aser sensakertem dang taochi sayutetba purtemji iba lima nung kanga kurua ishika tang angutsü. Saka itempurtem atemabo asen akümlitangsa timtem tekangshi ajak nungi jenbua litettsü ta Tsüngrem o-i ashir.
Iba lima nung ataloka aruba maparen kar shiner, tanü Minsitertem aser MLA tem ya New Delhi-i ojen aoba ya odangba masü, parnok ya ongpanglu tsükpeni aor ama oli aruli ta ojen aoba ya tanga kecha atema masü, saka development tapu aika atema aser nüburtem atema ta ashir, aser tesülen parnoki development “sanction” temelaba tila ka bener arutet nungbo, iba nungjagi parnoki “percentage” kar oli-oraba atema ta sen shilem ishikabosa agizüka yur ang tanüngba nungjagi commissioner, secretary, deputy commissionertem aser engineertem, S.D.O tem aser overseertem tashi teka terara menakdangbo “sanction” tu agi 50 percent dak tajemba agiang mapatem inyakba angudang nüburtemi temulung masüba ola adoker. Yamaji tang shiyonga aruba tulurtem tubo parnok teka menakba rongsentem jagi ki jen tajung süteper aser ali tesem aisü nung alitena ayur, koda jangratemtsü maparen ataloker. Aser ano police department nunga tapubang sünga molusüngzü, ita petinu agi zükbanga aketer tashi terara teka menakdang tilartembo kanga tang timtemdaktsür. Ashe tang shiyonga aruba tulurtem yagi kanga ochi shia inyak nungbo kodaser parnok ita sen kisüng agi ali aika alia ki jen tajung sütet-la? Aser karibo kanga tang ochi shia alir aser inyaker ta asüba o-ji tamamangtsü o lir. Iba jagi Mathi tapu 19:23 nungji yamai shia angur, takar nisung asoshi kodak yimli-i aitsübaji tasak lir ta Yisui pa nütsüngtemdang ashiba angur. Yamaji nisungtemi alima nung alitanga takar aser tulur kümner aser sür külena item jagisa kodakia tetunüba ta reprangteter. Aya, oda alima nunga takar aser tulurtem ya jangratema lirang tatem nunga kodakjia parnok senmangsa kümra, tanüngba nüburtem shirnok kanga timtem arema kibuba dak tamang kaa liogo, parnok atemaji takoksa ulura asütsü ta shisa bulua bilemer. Saka asen teyanglur Tsüngrem yagi alima nung aliba aser akaba ajak ya lenten metong asadanger aser tatem nung nisung shia nem tia-ji lemzüktsür aser iba tiaji shingaia nibo yabo magili ta meshitet-tsü mapang arudagi. Anungji temeshi laishibai ashir, I. Timoti 6:9-10 saka shirnoki takar kümner, parnok tatitang nung aser sang nung aser tamashi takoksa azüabongba nung tsüker, aser ibala nisungtem teraksa aser tesama nung araksetdaktsür. Kechiyong sen meimbaji tamajung tapu ajak tera lir ta shia angur. Ali rongsen ya sen agi alitsü akoker, la tepru ajungba aser tepuatsü sempet ulura keta lir, lai tulu tila ajak puar aser la tsüngdang ajak laoa doker, la koda ainket tulu lir. Saka shidakba nungbo la ya koyalaktsü den saku lir. Kechiyong iba dak mi-im “poison” keta lir. Aser ano sarikokta ya tepur onsara ajung aser lowa nungi “far of distance” tepur kang junga meren merema tajunütsüka arem nung tanga angur aser nisungtem ajak iba sentsü yagi atsüa arur, la tepur ajungba ya kecha dena medemtangtsü makok. Saka shidakba nungbo sarikokta süngjang ya telong nungbo naknaker aser kanga tako menemer. Yamaji sen agi atishia zülur, lai mezüngbo ajak puadoker, “attracted” saka tesülenbo iba yagi timbaka atsüa arua arishi tembangdaktsür. Iba o ya tesüngmangtsür. Iba o ya tesüngmangtsü rongnunga tesüngmangtsü aketba o ka lir. Anungji iba o yagi tulur aser tilar, tashir aser mashir ajak ayimjema shisatsü ngudakjangma ta sarasadema zülur.