Iba lima nung ya ni aser naji shiba, ya khen arok-aroka bilemdanga shisadangdi, arung

– R.IMKONG LKR DIPHUPAR, DIMAPUR

Iba alima nung ya Tsüngremi tebur aser tetsür külemi alitsü mezüngyongi renema doktsü. Tsüngremi ni aser na ta mezüngyongi lemsaa jateta meyutsü. Saka Tsüngremi Eden tsüki nungi tenzüka parnok temeimtep nung kangka putepa liyonga odaktsüba asenoki Lipok tapu 2 nungji angur. Mezüng yongi Adami tebutsü Eva-la dang na ta ajaba zulua mangur, aser Eva-laia tebuba Adam dang na ta ajaba zülua, shia mangur. Anungji, tena tsüngda nung temeimtep nung talubosa liasü ta Laishiba otsü jagi shia angur. Saka kodang tenati Tsüngremi ashiba mangai tai temenen mena, iba sülen tena joko aakseta atsüka ali ta shia angur. Mezüngyongi Tsüngremi Adam aser Eva na yanglua doktsüba nükjidongjibo pa mesükba nung yanglu ta shia angur. Aser süngdonglidongtem aser yangji lidaktsütsü atema alima shirurutem poktetdaktsü, aser tzü shirurutem aser anüng tom mopung nung yimzüba ozütem poktetdaktsü aser meimchirji (meimba chirji) item ajak madak kibur ketdang asütsü doktsü ta Lipok tapu 1:26 aser 28 nungji zülua angur. Saka kodang tenati Tsüngremi yanglua doktsüba temzüng alema inyak, yangji Pa kanga mepelai aküm aser iba anogo nung jagi tenzüka Kibuba Tsüngremi tena dang na aser nai ta ajaba Lipok tapu 3:16 aser 17 nungji zülua angur. Aser iba sülen alima ya temenen japujari agi asüngbaji ngua Tsüngrem kanga mepelai aküm ta Lipok tapu 6:5 nungi angur. Iba sülen alima nung tambu Noa mapang tzümetsüng (flood) tulu yoka alima temenenji jungjunga khen shidok ta Lipok tapu 7 nungji shia angur.
Iba sülen tambu Noa aser par kibong aser par chirtem aser item jala-nula nungi ano maneni soyapokyaa ao. Aser kodang meimchirtem nütsüng-nübo aika aküm, parnok den ano temenen süngjang tu maneni liasü ta temeshi Laishiba nungji shia angur. Yamaji asenok meimchir rongnung kechi mapasa inyakdir aser kechi loktisa tentetyonga odir, item ajak nungji asenoki na mesüra nai mesüra ni ta amshia ajaba o ya amshitsü tenzük, mezüngyongi iba oji züzüa dang jatepyonga aruba tanü tashi yamaji jatepba asenoki angashia arur. Iba ama jatepba ya tangatsüa majung aser tetezüjia kangabo majung ta angateter. Aser kodang naji mesüra nai aser ni ta amshia jatepdir, iba o nung jagi nüburtem tsüngda nung meputep tali adokdaktsür. Yamaji Tsüngremi Adam aser Eva-la tena dang na aser nai ta ajabaji meimba agi ajaba masü, saka Tsüngrem mulung nung jashia bilemba agi aja ta angatetter. Aser kodang iba lima nung meimchirtem tsüngda nung na, nai aser ni ta bendanga jateptsü tenzük, iba anogo nung jagi meputep tetenzüker liasü. Aser kodang meputep adok, meimchir tsüngda nung tsükchitep adok, aser kodang tsükchitep adok, alima ajungalen raratep (war) adok aser kodang raratep (war) adok, alima nung yimjung (peace) tu samaadok. Aser kodang yimjung tu samaa dok, meimchir tsüngda nung temeim nung mekonga aküm, aser kodang temeim tu nisung tsüngda mekonga kümadok, kecha ashitsüa mali, oda nisungi nisung to hau ta mali, kati ka kanga mesen-metua litepa aküm, aser iba amala tiaji molumi den atongba anasatiba liasü ta tatalokba kar ajanga kuli angur.
Iba lima nung ya nisung (meimchir) tapu aika angur, item rongnung niji mesüra naji Tsüngrem mapa nung tenzüker Pastor, Reverend aser Missionary kaka asütsü akok, mesüra Auer-Ashir (Dacoit) ka asütsü akok, mesüra sepai army nung tulur ka asütsü akok, mesüra police officer ka asütsü akok, mesüra tilar aser meshi-mejunger ni amala shingaia mezüngshiba taküm ka asütsüa akok, mesüra shishilembar (business) tulu ka asütsüa akok, mesüra tangar dang nungi jenshi-jenpongerang ka asütsü akok. Item ajak ya tulusang Tsüngremi nükjidong kaka yur yangluba aser kümdaktsüba nisungtem lir ta asenok ajaki angatetdi. A.Shin tapu 16 tekong 4 nungji angutsü.
Aser ano iba lima nung ya takartem (rich peoples) jenti angur aser alima nung sensaker (poor people) kata mali asübo, tanü takartem dang ya takartem ta mejala, aser tashi temeteter ya onok ama mashimemeteter aliba agi parnok tali shisanger ati. Aser ano iba lima nung ya tashitaiter melangteper (wrestler) ya tashi maitba purtem (feeble and weak) aliba agi parnok tali balaka jokteta jangjajangja akümer, aser itemia Tsüngremi pa nükjidong kaka yur yangluba nisungtem lir ta metetdi. Tsüngrem tsüngdangbo item takümtemji kecha balaka ta mezüngshir, saka shi telong ka dak Tsüngremi tangula apuoktsür takümtemji liteper ta metettsüla. Aser nisung meimchir taküm kaji kari mesüra kati lidaktsür masü, saka Tsüngem taochi agi alir ta angatettsüla. Anungji, meimchir ajak ya taküm ali tashi kati ka akhüm tsübutepa yaritepa alitsübaji Tsüngrem nükjidong lir aser ibaji pai aginüba lir.
Nisung kari pei takümji peisasa taküm tajung nung alir amai bilemer asü ? Masü, aji kodanga yamaji masü, ibaji tamashi (stupid, wicked person) suwar aser pei agitsü dang meimba nisung ta ashitsü akok. O tamashi nisung, na kechiba yamai shisa makaba taküm ka alir ? Na ya ashitsü agi atakatem (curse) aketba nisung ka lir ta nüsasa bilemer asü mebilemer? Ashiko, na ya Tsüngremibo Pa nükjidong tajung ka nung yanglu asütsüa akok! Nai kechiba ne taküm yamai mesenmetua alir ? Kenü anogo nai naji shibaar nesasa jangjajangja meteta akümtsü. Iba anogo nungjibo nai ne sasa ayako atentsü aser ojala, obala ta ola adoka nünga ayimtentsü mapangi ne nem bener arutsütsü. Anungji temeshi Laishibai yamai ashir, nisungji tangula ka dang mesüka lir: pa anogotemji süia aoba akhüm (shade) ka mesüka lir ta T.Ken 144:4 nungji shia angur. Anungji asen taküm ya iba lima nung tatsüka aliba mapangji kanga senti lir. Anungji Tsüngremi na aser niji kechi nükjidong nung iba lima nung ya lidaktsürar, aji kanga kümdanga mita alitsübaji koda tongtipang lir. Asen taküm ya junga aliba anogo nungji kanga arokaroka süoki ia bilemdangtsübaji onsara tongtipang ta metettsüla, aji mesüra tamajung anogotem asen dangi arua takümji menepadoktsü menua mali ta metetangma.
Yangi nisung asem indang o tatsüka shiner, nisung asemji ka (originating person) mezüng o jembisang mesüra jembila ta amshitsü akok aser tanabuba nisungi (reporting person) o belensang mesüra o belenla ta amshidi aser tasempuba nisungji (receiving person) o angazüksang mesüra agizüksang mesüra angazükla ta amshidi. Nisung karbo peisasa mapa tajung tila kata meyinyakteter ser nung pa mesüra la mulungsentsü tekirak aser külak-kübong agi sünger aliba nisungji ibai lir. (crooked person) iba nisung yagi nisung ana mesüra asem tsüngda nung o agi asayaa, naitena, naitena saang tamajung (cleaver trap) sua yutsür aser nisungtemi memeteti dang iba saang tamajung nungji shia doker, apur, aser timtem kanga angur, ajurur. Iba sang tamajung yanglusang aser yanglulaji tanabuba (reporting person) ta shia alibaji lir. iba nisung yagi, nisung ana mesüra asem tsüngda nung pa tekülak, shisatsü tamajung jagi kang junga asayateter. Tatishitsü agi , medemer o medemer na tsüngda nung khen agi bilema maliba (automatic puzzling game) asayar, aser niungtemi khen agi memeteti pa mesüra la tu maksüdaktsür, aji dang masü, saka lendong tulu nung anioktsür aser pai mesüra laibo memetet ser nung tangarba jagi pa mesüra laji sempaa kümdaktsür, aser teti atema pa mesüra la dak to temulung melemdaktsür. Iba mapa tamajung yagi nisung ka taküm lia molumi nung aronger ama ronga kangshidaktsür. Aser shibai iba tasa tamajung yanglu pabo mesüra la-bo temulung nung kanga menürema, oda kü tasa (plan) tu atalokogo ta iba takok anguba nungji pelaseter. Saka shiba (originating person) lir, paibo mesüra laibo o tajung, yimjung o tang jembi ser nung obelensang mesüra o belenla tu agi (reporting person) otem kanga mejungi belenssatsür, aser aji tanga kecha agia masü, saka pa/la tenükmerem agi (jealouse) tamagitsü o (unfounded words) yanglur nisungba tu ashiokja südaktsür. Anungji Tsüngrem o-i yamai ashir, na kechiba ne nüchi shisatsü tangar nem o bendangdaktsür ta ashir, iba tetezü kechiba ne ochi shisatsü tangar nem mashileni anishidaktsür ta tasembuba nisung (receiving person) dang tu asangdanger? Koda nai-a kechi langzütsü?
Tang temalen shiyonga aruba otsü olem-temji nisung tamajung (wicked person) kar ajanga alimaji kanga menena kümdaktsür, anungji temeshi lai nung shia aliba ama, koba o südir süaka kuli tejangja ana mesüra asem agi angazükba o-ji shidak ta memetentsüra, angashiba kisüng agibo nai tangar ka o tebendang, aji mesüra na nesasa kangla tarok dak tsükadoktsü ta metettsüla.
Nisung shibai tangar ka kecha masü nung tapi agi pa mesüra la laodaktsüba mesüra samatsüba nisungji shidakba ne medemer chichiba tu asütsü akok, saka pa mesüra la mulungjang nungji mojingi mapa inyaker. Anungji ibala nisung tu aesn tenük agi anguba mojingji lir, aser mojing temai adokba kuliji ibai-a ka lir ta metetangma. Iba tatalokba ya loktiliba nung yimten yimsüsüba nung aser Arogo ajak nung teti dena lir. iba atema asenok ajaki saksalema mita lidi ta tazünger aser tangashir ajak dang ayongzüker. Amen.