Iba linük ya sorkari aikati yangertet: PM Modi

New Delhi, November 27 (Agencies): Hokolbar nü Ato kilonser Narendra Modi-i opposition party tem dang, tangatetba nung mulungtepba lenmang ajanga dang tejakleni ottetsü, ta ashiba den külemi India linük ainba nung taoba mapang sorkar balalai shilem agiba tenüngsanga jembiogo.
Lok Sabha senden nung ‘Commitment to the Constitution’ onük nung o lemtepba mapang Modi-i, House nung majority tetezü, kari mulungba kangshia benokba masü, ta ashi.
“Asenoki majority-minority nung ajemdaker masü saka tangatetba nung mulungtepba ajanga tuluba inyaktsüla,” ta pai ashi.
Linük Temzüng reprangshitsü ta jembiba osang dak sentakba nung Modi-i, “Temzüng melenshitsü bilembaji soseta asüba den kasa lir,” ta ashi.
Linük ainba nung taoba mapang sorkartemi shilem agiba tenüngsanga Ato kilonseri, “Iba linük ya nisung aika aser sorkar aikati yangertet,” ta ashi.
“Iba linük atema taoba sorkartemibo kecha meinyak ta nisung shingaia mejembitettsü. Ni iba ya tanü dang jembir masü; Ni Red Fort nunga iba o ya jembiogo,” ta Modi-isa shisem.
Paisa ashiba agi, India ya Chubatemi yangerba masü saka nüburtem aser sorkartemi yangertet.