Iba ocet ajanga tongtibang onük 3 kheni dang lemsateper

– A.I. Maong Aier, Rtd. G/T, Alongmen ward, Mkg.

Ocet zülur aika aliba agi khen-khenbo olemsabang tesem ya mazüngi nüngteper. Anungji tongtibang onük asen kheni dang kü o tatsü agi yamai lemsateper.
A) Oshi aser zülumen nung meshisadangi amshiba ajanga teraksa aluba indang shisadangdi ta sür ni paper anaprongla nung taoba ita adoktsüba nung magütsüsemba olong pezü yamai agütsür. impur (town) Imsong (kidong tenüng ka) item olong ana ya yim nungi ratetba olong asü nung Yimpur aser Yimsong ta zülutsüla. Anu yim agi yanglu asü nung yimjung ta zülutsüla. Noktsüngeri amshiba oset ka, koba dang Insem ta ajar. Iba ya-a merang (yin) agi yangluba asü nung Insem ta masü Yinsem ta ang zülutsüla. Iba onük atema züludang ni ojang ta amshiba ajungaji olong ta melenshitsür. Asenoki angashia aruba ama ojang ta süra, engraji oshi nung syllable aser olong ta süra par oshi nung word. Tat: POK-PU (owl) iba nungi ojang ana adoker (two syllables) aser ojang anaji senteper olong ka adoker POKPU ta asür. Iba amaji ano ojang ka nungi shir tema meyokteper olong ka adokdaktsütsüba asen oshi nung talang baji ya.
SENTSÜ-WANG-SHI-DAK-TSÜ-TET-DAK-TSÜ-NÜ-RA-PANG-LA
Iba olong nungi ojang (syllables) 13 adoker. Iba amaji an oolong ishika meyokteper oren ka adoker aser ano oren ishika meyokteper otsü ka adoker.
B) Arhtsüba o (tarhtsüba o) bu shingaia manganür. Saka tajungshi o mesüra metongshitsüba o angashia shingaia mejashir aser tajangzük angur. Kü onük nungsa merajemba onük ka Tir Yimyim (adok 185) SATURDAY April 23, 2016 nung Wb. R.Imkong Lkr 4th Mile Diphupar, Dimapur pai yamai metongshitsüba ni kanga pela-a azüng. Ni aibelenbaji temeteter temibo metongshia zünger alitsü. Saka karibo ni ashibji shitak amai zünger alitsü. Pai kü onük nung tai aliba metongshidang nübur ajak tajangzük ngur alitsü ta yimlar. Pai metonghitsüba ama nia tejangja O ji yamai shidi. (Merang nung tapuk aliba agi mongseneri Merangpong ta ajar aser perang ta asaba agi jungliri perangpong ta ajar) iba olong nungji ya Ungmaji jungli oshi süaka parnokia merangpong ta ajar. Anungji pai ashi ama, jungli-mongsen mebendangi khari merangpong ta ajar aser khari perangpong ta ajar ta asütsüla ta teyuba lemsateper.
C) Taoba ita Tir Yimyim paper ajanga adianu ana onük ka nung ashishitepba züngshia, tena o ji nübur kharibo paper osang ajanga bendangtsütsü ta yongyaseta ata. Saka tena ashishiteper anenbaji dang asü. Anungji tena onokji ni kü o tatsü agi shidi aser ni bilemba ka shidangdi.
Taoba ita Tir Yimyim paper ajang Ao Temeshi Lai aser Golden Jubilee edition nung temelenshitsü khar putetba lemsateper ta sür, Dr. Y.Imti Tzüdir, Dimapur onük tatemlen pai ashiba ka yamai: Note . Anüdoklentip aser anüolentip. Ibai Ao osep nungbo North-ji anüdoklentip aser South-ji anüolentip ta shia lir. (onok school azüngdang tesayuri yamaji sayu) saka Ao Laishiba tekong aika nung North-ji anüolentip aser South-ji anüdoklentip ta agüja lir. ibai jungjunga research agir koba shitak lir aji agi melenshitsüla ta ashiba züngshi. Doctorbai ashibaji züngshia, kü ket nung aliba Dictionary ana tashi lapoker reprangdang nung, mezüngbuba dictionary nung yamai liasü. Dictionary nung taret o aika shia aliyonga mezüngbuba tongtibang kuli dang sayur. The North side of the building dosent get much sun. South: It is one of the rights if you are facing the rising sun. Tanabuba dictionary nung yamai liasü. North: The direction that is on the left when you look towards the rising sun. South: The direction that is on your right when you look at the rising sun. iba ya züngshir ni yamai bilem. Akhi mapang iba ya Ao oshi agi meyipdang dictionary mereprangi meyipzük südi ta bilem. Oda asenok ajaki angazüka aruba ama, asen teka tachichilenji teti anüdoklen. Tabilenji anüolen. Tokolaklenji oda anüdoklentip mesüka meyipzük aser tetsülenji anüolen ta meyipzük südi ta bilemer. Anüdoklen aser anüolen yabo teratettsü mali. Saka anüdoklentip aser anüolentip yabo tipshi (side) dang tetsür asü nung temangmangtsüka lir. Saka dictionary nung sayubaji meyipzükra, north-ji anüolen aser South-ji anüdoklen ta ama angateter, kü molung. Nung rata-mata-a bilema ali nung asen tsürabur Tsüknüngpenzüi-a, Doctorbai ashibaji o tajung agi shinga temolung meyirutsüsa timi shiogo. Nia pa den semloka yamai metongshitsür ta sür, North ta asübaji asen oshi nung anüdoklentip ta masü, saka anüolentip ta ang asütsüla aser South ta asübaji anüolentip ta masü anüdoklentip ta ang asütsüla. Iba ya akhi mapang tai meyipzük ta pai ashiba züngshi, iba sülenji ano doctorbai ni ashiba ama mesüi Penzübai ratettsüogo. Anungji North aser South asen oshi nung meyipzükbaji shitak asü tai-ar Ao Sendeni bendangtsü nung ajungtsü ta ashiba züngshi. Tsürabur Tsüknungi teyuba ka yamai : Anü tayidang reprangdangra, ilen ya anü sangwa junga meyaloker. Septsü ama alir aser lenden lima nungbo tzü atsünga alir. Ano koba engraji nung South ta ajar, iba ya asen oshi nung anüolentip masü. Saka anüdoklentip ta ajatsüla. Anü tayidang reprangdangra ilen tsütsü ya anü sangwa kanga junga yaloka angur. Tsüngsang tajung asüba mapang, nia anüngtsüng North aser South reprangdang pai ashiba shidak ajitet. Paper azüngertemia iba mapang tetzüdangang aser dictionary nunga reprangdangangma ta mepishir. Tsürabur Tsüknung yagi onok Govt. High School Mkg nung class VI nung azüngdang Geography subject agia onok dang North-ji anüdoklentip aser South-ji anüolentip ta sayu. Pai dang masü master ajaki yamaji sayu. Ni tesayur inyakdanga nia yamaji dang sayu. Iba ya asen Naga kin ajaki asen Aoeri meyipzükba ama dang meyipzüka alitsü südi. anungji dictionary nung reprangdanger rata-a bilemra asen kidanger tanga state, parnok oshi nunga koma meyipzük, aji jangjashir, doctorbai ashi ama, shibakbaji school nung sayutsüla. Laishiba nung Lai o den iba ya tai aliba putetba metongshitsüba züngshia pa dang kanga pelar aser ano T. Penzübaia teratet sayuba asoshi pa danga kanga pelar.