Iba ya alizüng tasen ka atema tetenzükerba lir : REM Group MD

Chungtiayimsen village ground nung 2 buba Youth Fest lapokba sentong nung Bollywood actress, Mahima Chaudhry den REM Group Chairman & MD, Temjen Imna Along Longkumer na arudang agiba noksa abelen nung angur. Achijilen aiürtemi ang ainba tetoktepba nung shilem agiba angur. 

Dimapur, Dec. 19 (TYO) : Hombar nungi anogo ananü Youth Fest 2016 – Tzurang Valley tenzükogo aser iba sentong nung actress Mahima Chaudhry-i anir Bollywood celebrity tem aika aden.
2 buba Youth Fest 2016 ya REM Group-i ayongzüka amunger aser yimtsüng balala den Assam nungia nisungtemi iba benjung nung shilem agir.
Sentong nung REM Group Chairman & MD, Temjen Imna Along Longkumer-i ashiba agi, Youth Fest ta tarutsü aser teimla tasen ka asoshi tetenzük ka ama alir.
Iba dak sendakba nung pai yimtsüng balala aser loktiliba dang Youth Fest mulungsoa agizüktsü ayongzük.
Along Longkumer-isa nübortem dang REM Group nungittsü ayongzüka jembidang, “iba telok ya bendanger mesüra India nunger shishilembar telok masü saka Tzurang lenden nung alirtemi tentetba telok ka lir. Iba telok nung aluyimertem jala jabasotem dena lir aser onoki tarutsü atema alizüng yua lir” ta metetdaktsü.
Youth Fest ayongzüka agiba nung alizüng metembanger saka iba ya tetenzüker ang lir. Alizüng tasen tongteta inyaktsü atema loktiliba nung meinprong malitsüla anungji nübortemi tensa tiptema ayutsü atema merangtsüla, ta paisa shisem.
Künü anogo, Tsüngremi temoatsü dena Naga nungertem dangi azükaru aser telongjem arutsü. Mapang kabo Naga tenemtem nung tetsübo medeni ochi jembiba mapang ka arutsü, ta REM Group MD-isa ashi.
Sentong nung tetushi tejaoker Mahima Chaudhry-i o jembidang, Naga nunger dak mulungso tangatetba aser tanga atsür arutsü sempet aliba atema tenüngsang agütsü.
Film industry nung Rebecca Changkija-i shilem agiba atema lai tenüngsang agütsü aser maneni Naga nunger kentener aser actor tem Bollywood nung shilem agiba reprangnür, ta shisem.
Sentong nung Sandeep M Tamgade IPS (Advisor Security to CM & President of NAPCS, New Delhi) den Bollywood celebrity tem- Avishik Sinha, Keka Ghoshal, Bollywood producer Rebecca Changkija aser Adrika Dance Group tem aden.
Nikongtsütsü shilem nung Bollywood kentenertem aser Adrika Dance Group nungeri shilem tajung agia liasü.