Ibai government mapa bushiba putu masü

Dimapur, Sept.10 (TYO): Kaketshirtem aika asoshi taoksatsüka aser kar asoshi tezüdangtsüka asütsüa akok saka ano kar asoshibo osang tajung ka asütsüsa tanü Tir Yimyim yimozülur, Wb.K.Temjen Jamiri kaketshirtem dang tanü putu tasenba ya government mapa bushiba putu masü, ta metetdaktsü.
Pai iba o ya Ao Kaketshir Telongjem Dimapur Government College pur 3 buba Sobaliba shisatokden sentong nung “Putu tasen nung sobaliba shisaluyim” onük nung shisalemsatepdang metetdakja liasü. Iba sentong ya Honibar nü Lotha Hoho ki Dimapur nung kaa liasü.
Paisa ashiba agi, Asenok Aortem sobalibaa aruba otsü ya putu pezüsü küma lemsatsü akok, itemji akhi tar nunger putu, lepteptsüngtepa mojing külemba putu, Khristan kümer kaketshisatsü angazüka  government mapai aiba putu aser tang putu tasenba nung zünga metetter peisasa mapa tenzüka rongsen züindaktsüba putu (entrepreneurship) asütsü.
Asen lima nung kaketreju lapoka kaketshisatsü angazük tenzükdang, kaketshisatsü angazükba nükjidongji government mapa inyaktsü asoshi dang liasü aser yamaji inyaka aru, saka tanü putu tasenba nung kaketshisatsü angazükba nükjidongji government mapa inyaktsüba dang nungi tuluba aser talangba, kechiyong tanü putu tasenba nung azüngertemibo peisasa pei akok mapa tenzüka ajak asoshi rongsen züindaktsütsüla, ta Tir Yimyim yimozülurisa kaketshirtem ayongzük. “Ibai mapa bushiba putu masü saka mapa agütsüba putu asütsüla,” ta paisa ashi.
“Sobaliba yabo tasodangyongi keter masor saka sor liyonga aodang angazüker aser itemji loktiliba nung liromedema benshia aor, anungji asenok taküm alidang kechi inyaker aji asenok sobaliba asütsü,” ta paisa metetdaktsü.
Putu tasen nung sobaliba shisaluyim indang tebilemba ka lemsatepdang, tanü putu tasenba ya tsükchitepba putu masü saka yimjung nung kin o kin na yaritepa rongsen renlokdaktsüba putu lir. Aji oda, iba putu tasenba nungbo Independent bushirtem dang nungibo Interdependent süa alitsü bushir kin teimba kümogo, ta yimozülurisa metetdaktsü.
Paisa kaketshirtem dang akhi putu tejenba nung tsükchir tsübua yim akümba aser alu ayimba yimya toktsür joko tanübo alu nung ki tajung (farm house) yanglur, yangji lia alu lenmang nung jajadang mapang aser rongsen meindoki tanü putu yimya nung  temang meraksatsüsa alu inyakdang asemba süoshi agir alu ayimba sobaliba tasen ka tenzüktsüla ta kaketshirtem ajungshi.
Yimozülurisa kaketshirtem dang pei apokba dezü aser kin kidong meteta alitsü aser temang anema alitsü asoshi achiajem, mejangba mapang aser maparen ajak nung mapang shitak – shitak amshia aliba sobaliba nung alitsü asoshi ajungshia liasü.
Iba sentong tanabuba senden nung Dimapur Govt. College nung tesayur Dr.Benjongi tesayur aser kaketshir tesendaktep indang jembia liasü.
Iba senden nungsa Dimapur Govt. College nung sangküm nungibo Ao oshi  agitsü asoshi lenmang bushiteptsü nüngdakba indang kaketshirtem rongnung jembia liasü.